Tung hneăng nếo, Đảng ƀô̆ Khu xiâm pơkuâ Hnê hriâm ƀă Hnê mơjiâng mơjiâng mơnhên tơkŭm 10 hnoăng cheăng ki xiâm, mơnhông tung mơjiâng Đảng ƀă pêi pro hnoăng cheăng kal kí.

Pôa Lê Thành Long, Phŏ Ngế pro xiâm hnê ngăn tơnêi têa kheăn kơdeăn troăng prôk la ngiâ, hnoăng cheăng châ tối tung Tơbleăng kal kí, tơdrêng amê tơtrŏng Đảng ƀô̆ kal tơtrŏng 6 tơdroăng ki xiâm: mơjiâng Đảng krúa lĕm, ó rơdêi; mơdêk ki dâi lĕm khu thái cô; kêi đeăng troăng pơkuâ hnê hriâm; mơnhông hnê hriâm đăi hok; pơkâ djâ troăng hngêi trung lâm; mơjiâng hngêi trung hriâm tơxâng tơdroăng kal vâ hriâm tâp ƀă tíu kơdrâm kuăn pơlê rêh ối, ki má lối cho hngêi trung phôh thong ai tíu kâ koi ối pơtê a 248 cheăm tơkăng tơnêi tơníu.