Rêm hâi, drêng mâ hâi tá hâi to a ‘ngêi laga mâu lêng dêi khu lêng Kan sát têa kơxĭ Việt Nam hiăng pơtăng tơdrăng lĕm, lế lĕm. Rêm ngiâ mâ mơdêi khât, rêm kơteăng chêng krá khât dêi mơngế lêng môi tiah pro piu lôi tơdroăng ki tâ tô dêi rơnó tô peăng Kơnhŏng tơnêi têa. Kong tô lối 40 đô̆ C lơ mâu kong mêi ton châ to lâi chô laga mâu ngế lêng xuân krá rơdêi, kơxo pơtâp – kơxê pơtâp, hên hâi pơtâp tá kơmăng.

Thươ̆ng ŭy Nguyễn Hữu Duy Thái tối: Vâ ai khu pơtâp ki lĕm rêm ngế tung khu thế mơ-eăm tâi ivá tơná. Rêm kơteăng chêng, rêm tơdroăng ki pro pơrá thế tro, rơmuăn lĕm. Mơhé tơbrê tơbrêh, laga kơbố xuân mơ-eăm mơhno tơdroăng ki rơdêi dêi ngế lêng Kan sát gâk kring têa kơxĭ Việt Nam.

‘’Xâp a châ hmân ếo Kan sát gâk kring têa kơxĭ mê á rơtế tâi tâng mâu ngế hriâm pơtâp tung khu hâk tơngăm, ro khât drêng châ kơteăng chêng a plông kân Ba Đình roh mê nah. Tơdroăng pơtâp drêng kong tô ó laga ngin xuân mơ-eăm tâi ivá tơná vâ kêi đeăng rơkê hnoăng châ pơcháu’’.

Ối tung dế khu lêng, Trung ŭiTrần Đức Nhân tâ rơrêk tung hiâm mơno: Kố cho tơdroăng ki hâk tơngăm kân ƀă châ chăn dêi tơná. Châ veăng tung khu lêng prôk pơtăng dêi hâi leh kân krip, Nhân ngăn mê cho tơdroăng hâk tơngăm, xuân cho hnoăng cheăng. Hiâm mơno tơrŭm môi tuăn ƀă tơdroăng khŏm mơ-eăm đi đo kum mâu kăn ƀô̆ mâu lêng tơkâ hluâ pá puât, tơbrê tơbrêh.

‘’Thế rak tơniăn dêi hiâm mơno dêi châ tơná vâ tơkâ hluâ. Tơná pin thế mơ-eăm hên ƀă thế ai tơdroăng khŏm mơ-eăm kân má môi. Tơdroăng ki hâk tơngăm cho á hiăng veăng kum môi iâ tung hnoăng cheăng kân dêi tơnêi têa’’.

Ƀă Thươ̆ng ŭi Nguyễn Phúc Đệ, klêi kơ’nâi xut thâ mâu kơto têa mêi ối krêa a ngiâ djê rơdjêk xua ối tung kong tô hên tối ăm ‘nâi mâu khu lêng hiăng kêi đeăng hneăng pơtâp ki xiâm, nôkố dế mot pơtâp trâu hơngế, tơkŭm pơtâp rơtế mâu khô̆i. Ai tơbrê, ai tơbrêh, laga ki má môi cho tơdroăng hâk tơngăm drêng xâp a châ hmân ếo Kan sát gâk kring têa kơxĭ, châ veăng kum môi iâ a hâi leh kân krip dêi hdroâng mơngế.

‘’Á mơhúa ‘nâng ƀă phiu ro drêng châ veăng tung tơdroăng châ pơxúa dêi hâi leh kân. Á ƀă mâu khu pú tung khu khŏm mơ-eăm tâi ivá vâ kêi đeăng rơkê hnoăng cheăng’’.

Klêi kơ’nâi roh tâi tâng tơkŭm pơtâp, Trung tươ̆ng Lê Quang Đạo - Kăn pơkuâ Kan sát gâk kring têa kơxĭ ƀă Trung tươ̆ng Bùi Quốc Oai – Chính ủi Kan sát gâk kring têa kơxĭ hiăng chu a tơraih tơƀai, troh rêm khu vâ kơ-êng, mơhnhôk. Mâu tơdroăng ki rup kŏng krá, mâu rơkong pơchân pêng păm tơdroăng ki loi tơngah, rơtế mâu kơxuô tơmeăm ki tơ’lêi hlâu hiăng gum tơ’nôm ivá hiâm mơno ăm kăn ƀô̆, mâu lêng. Teăng mâ Ngế pro xiâm hnê ngăn Khu xiâm pơkuâ lêng Kan sát gâk kring têa kơxĭ Việt Nam, Trung tươ̆ng Bùi Quốc Oai pơtroh:

‘’Mâu pú thế rak ivá, rak tơdroăng pơtâp, djâ tung châ tơná tơdroăng ki hâk tơngăm ƀă hâk ro. Tung hâi leh kân, rêm kơteăng chêng dêi mâu khu pú kô ôh tá xê mơhno ivá ó rơdêi ƀă tơdroăng ki tơtro tiô pơkâ, mê ối cho um méa dêi tơdroăng xông kân, mơnhông dêi khu Kan sát gâk kring têa kơxĭ Việt Nam’’.

Mơnhông hiâm mơno Kăch măng Khế 8 ƀă Hâi mơjiâng tơnêi têa lơ 2/9 ôh tá la lâi hía, rêh troh tá ah, ƀă khôi túa khŏm mơ-eăm ƀlêi trâng dêi Khu lêng kuăn pơlê Việt Nam, tơdroăng mơ-eăm tơrŭm môi tuăn, mơ-eăm đi đo dêi kăn ƀô̆ mâu lêng, Lêh ăm lêng prôk pơtăng  a Plông kân Ba Đình hâi lơ 2/9 la ngiâ, mâu kơteăng chêng ó rơdêi, tơdâng dêi pó dêi mâu lêng Kan sát gâk kring têa kơxĭ mơni kô cho um méa, ‘măn ăm tơdroăng ki trâu hơngế tung hiâm mơno kuăn pơlê lâp tơnêi têa ƀă pú hmâ lâp plâi tơnêi.