Sap ing kơxo má, hiăng ai lối 1.000 ngế lăm kĭ veăng pleăng mơheăm. Ing mê, khu tơkŭm po hiăng tơdah xo châ 622 tơdrong mơheăm. Jâ Ayun H’Hương, Kăn hnê ngăn Khu lo tŏng veăng, Kăn phŏ Hnê mơhno mơhnhôk pleăng mơheăm kong pơlê Dak Lak tối ăm ‘nâi, tâi tâng kơxô̆ mơheăm châ xo kô châ pơtroh a hngêi pơkeăng kân kơpong Tây Nguyên vâ kum tơdroăng thâ pơlât ƀă pơlât mâu ngế châi tamo, ki má lối cho tung roh Têt lo hơnăm nếo la ngiâ.

Tơdroăng Hâi tĭng pleăng mơheăm a Dak Lak hơnăm kố kô tơkŭm po a 5 tíu cho: Tơraih tơƀai Ƀuôn Ma Thuột, pơlê krâm Ƀuôn Hồ ƀă mâu tơring Krông Păč, Čư Mgar, Krông Năng. Hdrối mê, a mâu hâi lơ 4 ƀă lơ 5/1 pơla kố nah, tơdroăng tơkŭm po a Tơraih tơƀai Ƀuôn Ma Thuột ƀă tơring Krông Păč hiăng tơdah châ 620 tơdrong mơheăm.