A roh pêi cheăng, Vi ƀan kong pơlê Dak Lak hiăng tối 18 tơdroăng tơdjâk troh pá puât, tơvâ tơvân tung tơdroăng pơkuâ tơnêi têa ‘na loăng pơlái kong kế ƀă kong prâi. Tung mê, trâm pá hên má môi cho pơkuâ tơnêi tơníu ai xiâm kối cho tơnêi pêi chiâk deăng ƀă tơnêi kong. Tơdroăng chêh ‘măn tung kơmăi vi tĭnh ‘na kong tá hâi tŭm tâi tâng, tá hâi tơdâng tơ’mô ‘na tơdroăng chêh ‘măn ‘na tơnêi tơníu. Ki hên ƀăng deăng tơnêi ai xiâm kối ing tơnêi pêi chiâk deăng ƀă tơnêi kong pơcháu mơdrếo vêh a tơring nốkố xuân cho Vi ƀan râ cheăm pơkuâ, tá hâi ai troăng pơkuâ păng ‘nâng, hên ƀăng deăng tro tơbriêt, hdi tơnêi. Ing mê, pro pá puât ăm cheăm tung tơdroăng ăm tơnêi tung tơdroăng xúa tiô pơkâ pêi.

Vi ƀan hnê ngăn kong pơlê Dak Lak hiăng pro troăng pêi tâi tâng pơkuâ, xúa tơnêi ai xiâm kối tơnêi kong tơbleăng Khu xiâm pơkuâ loăng pơlái kong kế ƀă kong prâi ƀă mâu kơ koan tơnêi têa laga troh nôkố xuân tá hâi châ séa ngăn, hnê mơhno. Pôa Nguyễn Thiên Văn, Kăn phŏ hnê ngăn Vi ƀan kong pơlê Dak Lak tối tơdroăng ki ai khât:

“Tơdroăng tơxup tơbriât, xăm tối, tơhôu ‘na tơnêi tơníu a mâu tơdroăng tơkêa bro tơnêi pêi chiâk deăng ƀă tơnêi kong ƀă mâu kŏng ti pơkuâ tơnêi pêi chiâk deăng ƀă tơnêi kong tung kong pơlê cho ôh tá tơniăn. Tơdroăng tơleăng tơdroăng tơxup tơbriât, xăm tối tơnêi tơníu ƀă xo tơvêh tơnêi kong tro hdi xo trâm hên pá puât, tá hâi troăng vâ tơleăng tâi’’.

Rơtế ƀă pá puât, tơvâ tơvân tơdjâk troh pơkuâ tơnêi pêi chiâk deăng ƀă tơnêi kong, Vi ƀan kong pơlê Dak Lak xuân hiăng tối hên tơdroăng kal châ Khu xiâm pơkuâ loăng pơlái kong kế ƀă kong prâi rơtế mâu kơ koan tơnêi têa séa ngăn, tơleăng. Ki má lối cho drêng Luât tơnêi 2024 tá hâi xêt khât pêi pro, tơdroăng xúa mâu pơkâ Luât tơnêi tơníu 2013 ƀă mâu mơ-éa pá xôp luât ối ai mâu tơdroăng ki tơvâ tơvân, ối tơtrâ dêi pó, kal châ séa ngăn, hnê mơhno, tơleăng.

Pơkâ xúa tơnêi dêi Dak Lak troh hơnăm 2025 châ Ngế pro xiâm hnê ngăn Chin phuh xing xoăng a Pơkâ 326 hơnăm 2022 tá hâi tơxâng châ tơdroăng kal vâ khât nôkố. Luât tơmeăm khoăng tung kơdâm tơnêi ƀă mâu mơ-éa hnê mơhno ‘na tơdroăng pro mơ-éa ăm phêp tơdroăng chiâ xo tơmeăm khoăng tung kơdâm tơnêi ối tơvâ tơvân, pá puât ton xŏn, tá hâi tơtro ƀă hên tơdroăng tơmeăm khoăng tung kơdâm tơnêi pro tơmeăm mơjiâng pro tơmeăm ki tiah hmâ, ki rơhêng vâ tối cho chiâ xo tơnêi vâ tơbêng ƀă hía hé.

Xông tơpui mơgêi roh pêi cheăng, pôa Đặng Quốc Khánh, Ngế xiâm pơkuâ loăng pơlái kong kế ƀă kong prâi tối ăm ‘nâi, khu râ kăn pêi cheăng dêi khu xiâm pêi cheăng ƀă mâu kong pơlê vâ tah lôi mâu tơdroăng pá puât, tơvâ tơvân ăm kong pơlê. Tơdrêng amê, xo rơkong tơpui ing mâu kong pơlê vâ rĕng mơjiâng, kêi đeăng Pơkâ djâ Luât tơnêi tơníu 2024 tung tơdroăng rêh ối.

Kố cho khu luât ki kơnâ kân ƀă tơdroăng rêh ối, pơlê pơla. Tung mê, Ngế xiâm pơchân tối kong pơlê Dak Lak kal hbrâ, thăm pêi pro rĕng mơjiâng khu yă tơnêi, tơdroăng ‘na tơnêi vâ drêng Luât ai xêt khât mê xúa tơdrêng hlối. Tơdrêng amê, kong pơlê thế tơtrŏng tơleăng mâu tơdroăng ki ối tơvâ tơvâ ki Khu pơkuâ loăng pơlái kong kế ƀă kong prâi kô chiâng pêi tơdrêng mê cho pro ăm mơ-éa mơnhên hnoăng xúa tơnêi ăm kuăn pơlê ối tơniăn, ôh tá tơxup tơbriât, ôh tá pro xôi luât.

Krê ƀă tơdroăng ki tô má môi cho tơnêi pêi chiâk deăng ƀă tơnêi kong, pôa Đặng Quốc Khánh pơkâ thế kong pơlê Dak Lak thế séa ngăn tâi tâng ƀă xing xoăng vâ drêng Luât tơnêi 2024 ai xêt khât kô chiâng tơleăng hên ƀăng deăng tơnêi. Ngế xiâm pơchân tối nhên tơdroăng tơdâng pơxúa dêi kuăn pơlê ƀă khu tê mơdró tung tơdroăng tơnêi pêi chiâk deăng ƀă tơnêi kong:

“Pơkâ thế Vi ƀan kong pơlê, Khu hnê mơhno má môi cheăng Đảng kong pơlê hnê mơhno séa ngăn tâi tâng tơnêi tơníu pêi chiâk deăng ƀă tơnêi kong. Nah ối ăm tơnêi dêi kuăn pơlê tung tơnêi kong, nôkố hiăng tơlo mê kuăn pơlê ƀă khu pơkuâ kong, kŏng ti tơxup tơbriât dêi pó. Xua, drêng tơlo, drêng pêi troăng pơhlêh tơnêi ôh tá nhên, ôh tá ai vê kơchuâ, ôh tá ai ƀăng deăng, kân rơkâ klêi mê pơtối hdi tơbriât dêi pó. Á pơkâ thế séa ngăn ƀă xing xoăng. Kŏng nhân mê xuân cho kuăn pơlê pin, vâi ối a mê to lâi chât hơnăm kố, ti lâi thế pá puât. Pin thế tơdâng pơxúa dêi kuăn pơlê, dêi khu tê mơdró ƀă tơdroăng ki ton nah. Luât ai xêt khât, tơnêi dêi pêi chiâk deăng ƀă tơnêi kong laga kuăn pơlê hiăng rêh ối tơniăn sap ing hơnăm 2004, tá tơnêi pêt mơjiâng tơmeăm khoăng, tơnêi ối ăm kuăn pơlê. Ƀă ƀăng deăng dế tơxup tơbriât mê thế mơnhên ngăn tơdroăng ton nah gá ki klâi. Ki klâi chiâ tiô luât mê pó thế pêi hdrối.’’

   Khu xiâm pơkuâ loăng pơlái kong kế ƀă kong prâi xuân pơkâ thế kong pơlê Dak Lak thăm pơkuâ tơnêi têa ‘na tơmeăm tung kơdâm tơnêi têa, tơmeăm têa, mơgrúa xok, trếo ki mơ’no lo pa kong; mơngế pêi cheăng ăm kơvâ pơkuâ loăng pơlái kong kế ƀă kong prâi troh la ngiâ kố ah kô xing xoăng troh 70% tơdroăng cheăng ing râ xiâm vêh ăm kong pơlê. Ngế xiâm xuân pơkuâ kong pơlê Dak Lak tơtrŏng troh tơdroăng hbrâ mơdât chếo kong tung rơnó tô kố, drêng ăm hlo kong prâi khăng khoăng hơnăm kố cho râ ó ‘nâng./.