A roh trâm mâ, kăn teăng mâ châ tơmâng tơbleăng ‘na tơmeăm ki ai hlâu ƀă mâu tơdroăng châ tơƀrê mơnhông cheăng kâ, rêh ối pơlê pơla dêi kong pơlê Dak Lak  tung pơla kố nah. Kuăn pơlê pin ki rêh ối a kong têa ê tối phiu ro ƀă mâu tơdroăng pơhlêh ‘na ngiâ méa ƀă tơdroăng mơnhông mơdêk cheăng kâ – rêh ối pơlê pơla dêi Dak Lak; tối mâu tơdroăng tơmiât, pói vâ dêi kuăn pơlê hơngế pơlê xiâm, pói vâ kong pơlê pơtối pro tơ’lêi hlâu vâ kuăn pơlê ki rêh a kong têa ê mơ’no liăn cheăng ‘na cheăng kâ, kum mơjiâng ƀă mơnhông pơlê xiâm.

Xông tơpui a roh trâm mâ kố, jâ H’Yim Kđoh, Kăn phŏ hnê ngăn Vi ƀan kong pơlê Dak Lak teăng mâ khu râ kăn pơkuâ kong pơlê mơnhên, kheăn kơdeăn mâu tơdroăng veăng kum dêi mâu kuăn pơlê ki rêh ối pêi cheăng a kong têa ê tung mâu hơnăm hiăng hluâ; mơnhên Đảng, Tơnêi têa đi đo tơmâng tŏng kum ƀă nhuô̆m pơlê pơla mơngế Việt Nam a kong têa ê cho môi khu ki kal ôh tá păng klâ, cho môi ivá mơnhông dêi tơnêi têa, dêi kong pơlê.