A chôu phut pêi cheăng mê, khu kăn hnê ngăn kong pơlê Nghệ An hiăng pơkâ mâu troăng hơlâ ai tơdjâk troh mâu troăng hơlâ ‘na pơkuâ rak liăn ngân-hngêi rak liăn dêi tơnêi têa; troăng pơlâ ‘na pơkuâ ngăn kơphô̆, têa, tơmeăm khoăng tung kơdâm tơnêi, hyôh kong prâi; troăng pơkâ ‘na pơkuâ mơ’no liăn cheăng; mơnhông ‘na tơnăng ká xixŏng, mơdró kâ ká xixŏng; tơkŭm rah xo mơngế rơkê kơhnâ pro pơkuâ, tơdroăng tăng rah mơngế ki rơkê kơhnâ khât ƀă hên hĭn mâu tơdroăng ki ê.

Xông tơpui hnê mơhno a chôu phut pêi cheăng mê, pôa Vương Đình Huệ tối nhên, Tơdroăng pơkâ 39 dêi Khu xiâm ngăn ‘na cheăng kal kí hiăng pơcháu ăm Đảng đoân dêi Kuô̆k hô̆i vêh séa mơnhên ngăn, ai tơdroăng ki xiâm, ki kal, tơtro ƀă troăng hơlâ ki tơ’ló hnoăng vâ mơjiâng kong pơlê Nghệ An mơnhông tŭm têk kơvâ cheăng tơtro ƀă hnoăng mơnhông pêi cheăng kâ-rêh ối pơlê pơla dêi lâp tơnêi têa, pơkâ tơdroăng cheăng dêi tơnêi têa ƀă pơkâ hdró pơlê kong kơdrâm Vinh chiâng tíu xiâm ki mơnhông pêi cheăng kâ-túa lĕm tro dêi tâi tâng kơpong Kơnhŏng tơnêi têa.

Pôa Vương Đình Huệ pâ thế, kong pơlê Nghệ An vêh séa mơnhên ngăn mâu troăng hơlâ ki mâu luât nếo châ Kuô̆k hô̆i mơ’no kô châ tơƀrê, vâ tah lôi mâu tơdroăng ki bố bối dêi pó maluâ tung mâu tơdroăng ki Pơkâ mơ’no klêi kơ’nâi hôp; mâu troăng pơkâ klêi kơ’nâi mơ’no mê pơkal athế tro vâ pêi pro tơ’lêi hlâu, ai pơxúa khât. Klêi kơ’nâi hneăng hôp kố, Vi ƀan râng liăn ngân dêi Kuô̆k hô̆i veăng rơtế ƀă Khu xiâm ngăn tơdroăng pơkâ mơ’no liăn ƀă hiâm mơno ki pôu râng hnoăng cheăng má môi vâ pêi pro, thâ rĕng pơtroh ăm Vi ƀan hnê ngăn Kuô̆k hô̆i.