Pôa Y Dẫn Êban, kuăn ngo Rơđế, cho đảng viên veăng tơkŭm hôp a Chi ƀô̆ thôn Đoàn Thành 2, cheăm Hòa Đông, tơring krông Pač, kong pơlê Dak Lak. Têt kố nah, rơpŏng hngêi tâ ro kơnôm ai mâu tơmeăm pê lo ing chiâk deăng châ hên, hlối ai yă, malối châ xo liăn hên  lối 3,4 rơtal liăn vâ pro mơgrúa tơnêi tiô tơdroăng Tơkêa bro troăng kân Khánh Hòa - Ƀuôn Ma Thuột. Ing kơxô̆ liăn ki mê, pôa xo vâ chê 500 rơtuh liăn rôe ô tô vâ prôk lăm, lối 2,9 rơtal liăn ki u ối pơtối ‘no liăn rôe 2 ha tơnêi pêt kơphế tơvât ƀă plâi sầu riêng cho xiâm ki châ xo tơ’mot liăn tung la ngiâ. Tơdroăng rôe rơxế ƀă pơtối ‘no liăn pro kodrum deăng hiăng châ rơpŏng hngêi tơmiât nhên ƀă môi tuăn drêng châ ‘nâi tơnêi ƀă loăng plâi tro xo tơvêh vâ mơjiâng pro tơdroăng tơkêa bro. Đảng viên Y Dẫn hơ’muăn:

“Hngêi á ai tâi tâng 8,4 sào tơnêi pêt kơphế, sầu riêng, tiu ƀă mâu loăng plâi kâ, châ xo tơ’mot rêm hơnăm  300 rơtuh liăn. Drêng ai troăng rơhlâ a hơnăm 2021, xua á cho đảng viên, ƀă mâu ngế tung rơpŏng hngêi xuân cho đảng viên mê chiâng môi tuăn tiô troăng rơhlâ pro troăng ki Tơnêi têa hiăng pơkâ, châ Tơnêi têa chêl thiăn, púi vâ tiah kố  xo ah hmôi drêng ai troăng tơdroăng prôk lăm tơ’lêi hlâu tâ, tơ’lêi prôk lăm, tê mơdró’’.

Rơpŏng hngêi đảng viên Y Ngắt Niê a cheăm Ea Yông, tơring Krông Pač xuân ai lối 500m2 tơnêi ƀă lối 70 xiâm kơphê tro gu tơbăng tơnêi vâ mơjiâng tơdroăng tơkêa bro troăng kân tơdrăng Khánh Hòa – Ƀuôn Ma Thuột. Ngoh ăm ‘nâi, ing tơnêi ƀă kơxô̆ loăng plâi pêt mê, rơpŏng hngêi châ xo lối 120 rơtuh liăn chêl thiăn a liăn gu tơ ƀăng tơnêi. Tâi tâng kơxô̆ liăn châ xúa a tơdroăng ‘no liăn pêi, teăng ki nếo kuâ hngêi lêm ƀă gât hngêi trá xŏn. Rơpŏng hngêi xuân cho môi tung mâu rơpŏng ki djâ troăng ahdrối a cheăm Ea Yông rak tro luât riân ngăn, vế tro, ƀă pêi pro tiô troăng rơhlâ chêl thiê̆n rĕng pơcháu tơnêi. Đảng viên Y Ngắt ai tối:

“Ai troăng rơhlâ krếo pơcháu tơnêi vâ pro troăng kân tơdrăng lĕm Khánh Hòa – Ƀuôn Ma Thuột mê rơpŏng hngêi a xuân môi tuăn, vâ ‘no kơxô̆ liăn chêl thiăn gu tơnêi. Xua a cho ngế đảng viên mê xuân pơtối pêi ahdrối vâ kuăn pơlê ngăn ƀă pêi ƀối vâ ai troăng prôk lĕm, tơ’lêi hlâu prôk lăm tung la ngiâ. Ƀă a xuân krếo nhŏng o kuăn pơlê ki ai tơnêi tro xo vâ pro troăng mê xuân rĕng môi tuăn xo liăn chêl thiê̆n ƀă pơcháu tơnêi la vâi xuân ro, môi tuăn xo liăn chêl thiăn”.

Tơdroăng tơkêa bro troăng kân sap Khánh Hòa – Ƀuôn Ma Thuột, pơla rôh má 1 tơkâ luâ tơring Krông Pač xŏn 33,3km cho tơnêi ki ăm pro troăng lối 255ha. Lối 2.000 rơpŏng kuăn pơlê dêi 8 to cheăm ai tơnêi xo tơvêh tro tơdjâk. Vi ƀan tơring hiăng pêi 9 rôh chêl thiăn, tâi tâng kơxô̆ liăn lối 344 rơtal liăn. Tâi tâng tơnêi xo tơvêh tơnêi vâ pro troăng a tơring hiăng châ pơcháu ăm mâu tíu ki mơjiâng pro tơdroăng tơkêa bro.

Tiô pôa Phạm Văn Hà - Kăn phŏ hnê ngăn Vi ƀan cheăm Hòa Đông, tơnêi a kơpong tơring Krông Pač tối tơdjuôm ƀă cheăm Hòa Đông tối krê ki hên cho tơnêi ƀazan, tơtro ƀă pêt kơphế, tiu, malối pêt sầu riêng châ pơxúa hên tung cheăng kâ. Rêm ha kô châ xo kơxô̆ 800 rơpâu troh 1,2 rơtal liăn/hơnăm. Mơhé tơƀrê hên cheăng kâ la drêng ai troăng rơhlâ xo tơvêh tơnêi mơjiâng troăng kân tơdrăng, kuăn pơlê vâ môi tuăn, djâ troăng ahdrối tung tơdroăng mê cho mâu đảng viên, tung mê ai hên đảng viên mơngế kuăn ngo a cheăm. Pôa Phạm Văn Hà tối:    

“Tung kơxô̆ 152 rơpŏng a cheăm Hòa Đông ai tơnêi troăng kân tơdrăng lĕm tơkâ luâ, mê ai vâ chê tơdế kơxô̆ rơpŏng cho kuăn ngo, ƀă ai hên rơpŏng cho kăn ƀô̆, đảng viên. Ngăn tơdjuôm mâu kăn ƀô̆, đảng viên mê xuân djâ troăng ahdrối tung tơdroăng pơcháu tơnêi ƀă tơdroăng mơjiâng tơdroăng tơkêa bro. Mê cho pôa Y Dẫn, rơpŏng hngêi kố ai tơnêi kân vâ chê 1 ha tơnêi ki tro xo tơvêh, ‘nâi mơ-eăm kum riân, xo liăn. Mâu đảng viên ki ê xuân tiah mê’’.

Ƀă troăng rơhlâ  “đảng viên prôk hdrối pơlê prôk kơ’nâi” dêi mâu đảng viên a cheăm Hòa Đông ƀă cheăm Ea Yông dêi tơring Krông Pač, kong pơlê Dak Lak, tơdroăng xo tơvêh tơnêi ăm pro troăng mơjiâng Tơdroăng tơkêa bro troăng kân Khánh Hòa - Ƀuôn Ma Thuột hiăng châ rĕng pro tâng vâ pơchông ƀă mâu tơring ki ê a Dak Lak.