Lam troh a chêng ngo Phước Bình, tơring Bác Ái, kong pơlê Ninh Thuận tung mâu hâi vâ chê Têt kố, drêng loăng kong dế pơ’lêh hlá mê kơdrum loăng plâi kâ mê cho: Krui ƀŏng kơtôu ngiât 300 xiâm, 50 xiâm loăng plâi sầu riêng, plâi treăng xâk dêi rơpŏng hngêi pôa Katơr Quỳnh ối a thôn Hành Rạc 2 xuân ngiât lĕm. Tung kơdrum loăng sầu riêng dế tơpo reăng, kơdrum loăng krui ƀŏng dế kôm vâ krí plâi a rôh Têt.

Tơdah ngin tung hngêi nếo mơjiâng pro vâ chê 1 rơtal liăn pakĭng mê ai hngêi trá xŏn tiô khôi hmâ dêi mơngế Raglai, ngế đảng viên lối 39 hơnăm cheăng tung Khu pơkuâ hnê ngăn Đảng phiu ro ăm ‘nâi: Hdrối nah, rơpŏng hngêi á xuân xuân môi tiah hên hngêi kuăn pơlê ki ê tung cheăm Phước Bình bú ‘nâi to pêt loăng hôt ƀă mâu loăng plâi iâ khế môi tiah alâi, prá, mê ôh tá châ ki klâi. Sap châ mâu kăn hnê pơ’lêh hdrê pêt, rơpŏng hngêi hiăng khên pơ’lêh vâ chê 2 ha tơnêi pêt krui ƀŏng kơtôu ngiât, loăng sầu riêng ƀă plâi treăng xâk, tơkŭm ƀă túa ôm hyô ngăn nhâ loăng kuăn kiâ kơdrum châ xo tơ’mot liăn lối 150 rơtuh liăn/hơnăm.Sap ing mê pôa mơhnhôk, hnê kuăn pơlê pơ’lêh túa cheăng vâ mơnhông cheăng kâ:

“Ngế đảng viên thế prôk hdrối, xok, têa ‘mêi... thế kơpuih văng troăng prôk thế krúa lĕm ƀă hên loăng pro ăm xâp rơngiâp. Troăng pro ôm hyô, troăng thế krúa lĕm, ƀă thế ai hên loăng xâp rơngiâp. Troăng ôm hyô to nhâ êa, to xok kơbố há vâ prôk troh. Hlê tơdroăng mê, thế hnê mơhnhôk, tối kuăn pơlê vâ kuăn pơlê tơmâng pro ƀối, mê pin thế pêi hdrối. Pin pêi hdrối ki hdrối, kuăn ‘nĕng pin, klêi mê po rơdâ túa ki mê ăm tâi tâng ‘nâi’’.

Kơtăn mê ôh tá hơngế cho hngêi trá dêi rơpŏng hngêi đảng viên hơnăm ối nếo Katơr Chin. Rơpŏng hngêi ngoh Chinh xuân cho môi tung mâu rơpŏng ki djâ troăng a hdrối ‘no liăn mơnhông ôm hyô tung kuăn pơlê. Ngoh Chinh ăm ‘nâi, tơmối troh akố, pakĭng lăm pôu ngăn kơdrum loăng plâi kâ, ối veăng châ mơnúa kâ kế kâ ton nah dêi mơngế Raglai môi tiah hmê tơxông prông, í pôh, pheăng, ká têa kroăng... ngăn túa kơhnhon xuăng dêi kuăn ngo Raglai, Churu.

“Peăng á xuân ai khu tơrŭm tung khu vâ mơnhông ôm hyô tung kuăn pơlê sap Chapi 1 troh Chapi 6. Nôkố ngin xuân dế mơ-eăm ‘mâi rơnêu pro dêi hơpăm ăm gá lĕm vâ kum ăm tơmối mot ối xah hêi tung pơla Têt. Khu ki xiâm dêi o ai 2 ngế đảng viên, a cho phŏ khu ƀă 5 ngế ki ê cheăng tơdah ngăn tơmối. Pakĭng mê, ối ai khu 23 ngế vâ veăng tơdroăng xah hơdruê xuăng’’.

Tơdroăng pơkâ Hneăng hôp Đảng ƀô̆ cheăm Phước Bình, tơring Bác Ái hiăng pơkâ tơdroăng cheăng ƀă troăng rơhlâ tung tơdroăng tơbâ ƀă pơtối rak túa ki lĕm ton nah mơnhông cheăng kâ - rêh ối kong pơlê. Mơhnhôk kuăn pơlê pơ’lêh tuăn tơmiât, tơdroăng rêh ối rơtế ƀă veăng mơjiâng túa “Ôm hyô ngăn nhâ loăng kuăn kiâ ƀă túa lĕm tro kuăn pơlê’’ - cho mâu ngế đảng viên Ragali. Kơ’nâi hnê, mơhnhôk, troh nôkố, lâp tung cheăm Phước Bình, tơring Bác Ái hiăng ai 120 rơpŏng Raglai veăng pêi, tung mê ai 60 rơpŏng rak tơniăn mâu pơkâ ƀă púi vâ veăng mơhnhông ôm hyô tung kuăn pơlê.

Đảng ủy ƀă Vi ƀan cheăm Phước Bình hiăng tơbleăng ôm hyô tiô troăng mơjiâng mâu tơdroăng pêi pro ăm túa pêi pro ing xiâm liăn kum dêi Tơnêi têa ƀă kuăn pơlê ‘no liăn mơjiâng pro: mê cho hngêi trá tiô khôi hmâ ton nah; hngêi pơyâng, ‘mâi pro lĕm mơnâ mâ, krâ kơmăi tôm xo xok, pro tíu tơbleăng mơhno troăng ƀă hía hé.

Pêi pro tiô tơdroăng Tơkêa Mơhnhôk ôm hyô tung kuăn pơlê mơnúa pêi a cheăm Phước Bình pơla hơnăm 2019-2022, kơxô̆ tơmối lăm hyô ngăn a mâu tíu ôm hyô ngăn nhâ loăng kuăn kiâ, túa lĕm tro cheăm Phước Bình hiăng mơnhông tơƀrê ing 5.000 – 7.000 ngế troh lăm ngăn. Kuăn pơlê akố hiănng pơ’lêh tuăn tơmiât pêi cheăng kâ mơnhông cheăng kâ rơpŏng hngêi. Jâ Pi Năng Thị Cô, kăn phŏ hnê ngăn Đảng ủy cheăm Bình Phước, tơring Bác Ái ăm ‘nâi:

“Malối pơ’lêh hdrê pêt. Sap ing mê troh nôkố teăng pơ’lêh nhên  thế đi đo, kuăn pơlê ối ‘nâi mơdró kâ, pơtối hriâm pêi hên troăng. Ing mê, ai 5 hdroâng kuăn ngo nhŏng o. pơlê ‘nâi mơnê Xuăn, Chăm, Raglai, Churu la rêh ối môi tuăn, phá tâ ton nah. Nôkô pơlêh hên ‘nâng”.

Ing tơdroăng ăm hlo ki hiăng châ pêi, Vi ƀan tơring Bác Ái, kong pơlê Ninh Thuận pơtối pơkâ tơdroăng tơkêa pro hơnăm nếo pơla 2023-2025 ƀă mâ ngăn troh hơnăm 2030 ‘na mơnhông ôm hyô tung tơring. Tung mê, tơkŭm po rơdâ, pê klêi mâu tơmeăm ôm hyô kuăn ngo. Tung mê, tơkŭm po rơdâ pê klêi mâu tơmeăm pê lo tơmeăm, mơnhông ôm hyô tung kuăn pơlê cheăm Phước Bình. Malối tung hơnăm 2024 kố, tơbleăng pêi tơdroăng tơkêa kơxô̆ 6 dêi tơdroăng pơkâ đêi tơnêi têa ‘na mơnhông cheăng kâ - rêh ối kơpong kuăn ngo kong ngo.  

Ngăn ‘na ôm hyô cho pôa Trần Văn Toàn, ngế pơkuâ ƀơrô túa lĕm tro tơring Bác Ái, kong pơlê Ninh Thuận ăm ‘nâi, túa ôm hyô tung kuăn pơlê cho môi tơdroăng ki tơ’lêi ‘na tơmeăm khoăng dêi kong pơlê ƀă tíu ki nếo tơƀrê tung tơdroăng cheăng kâ dêi tơring.

“Pơtối tung hơnăm 2024 kố hlối po rơdâ mâu rơpŏng vâ mơnhông ôm hyô, pakĭng mê mâu rơpŏng ai tung hơnăm 2022, 2023 pơtối pê klêi, pêi rơkê tâ, vâ tơdroăng pêi pro tiô luât pơkâ, rak ngăn ai khoa hok ƀă tơbleăngtroh tung kuăn pơlê’’.

Vâ veăng ‘no hnoăng djâ troăng Phước Bình mơnhông chiâng pơlê ôm hyô tung kuăn pơlê ƀă po rơdâ mâu pơlê ôm hyô tung kuăn pơlê ki ê dêi kong pơlê Ninh Thuận, tung la ngiâ, mâu đảng viên mơngế Raglai a cheăm Phước Bình, tơring Bác Ái kô pơtối mơdêk hnoăng cheăng dêi tơná tung mơhnhôk kuăn pơlê rơtế ƀă pơlê cheăm veăng mơjiâng túa “Ôm hyô ngăn nhâ loăng kuăn kiâ ƀă túa lĕm tro tung kuăn pơlê”.