Ƀă tơdroăng kơdo mơ-eăm khât, tung mâu hâi achê kố, khu Kŏng an Dak Nông hiăng hên rôh pê klêi hnoăng cheăng hbrâ, tăng rup mâu ki ai xôi. Malối, hiăng tơplâ châ rŭm tơleăng 2 tơdroăng 2 ngế ki hriăn pro hlá mơ-éa ôh tá xê khât dêi kơ koan khu tơrŭm cheăng ƀă ăm mung liăn xo tơvêh liăn rơkâ hên tak troh 1080% tung môi hơnăm, châ xo hên tơkâ bê 5 rơtal liăn; tơplâ tăng rup, tơleăng pâk 2 ngế ki xúa kŏng ngê̆ hêak pơloi châ kâ liăn ngân vâi tung măng lối 1.000 ngế tung lâp tơnêi têa; mơ-eăm rup 2 rôh, tơleăng pơxâu phâk 3 ngế ki tê, rôe kơtôa tơmeăm ôh tá ăm tê, rup xo lối 660 răng pháu, mlŏi, ƀă hên mâu tơmeăm ki ê.

Ing mê, veăng pro tơniăn, châ rêm râ, mâu kơvâ cheăng hlối khĕn kơdeăn, kuăn pơlê loi nhoăm. Tơmâng xo ƀă khĕn kơdeăn mâu hnoăng hiăng châ pêi pro, Khu xiâm Kŏng an hiăng ai pơkâ khĕn kơdeăn 18 khu pú hên dêi Kŏng an kong pơlê Dak Nông.