Ƀă troăng pêi “rah ngế ki lâi, krá ngế ki mê”, hơnăm 2024, Hô̆i đong pơkuâ lêng mâu râ a kong pơlê Lâm Đồng hiăng tơkŭm rah mâu droh rơtăm ki tơniăn lăm pro lêng, rak tơniăn tiô pơkâ, dâi lĕm ƀă tơxâng mâu pơkâ ‘na mơjiâng khu lêng tung rơxông nếo. Tung mê, droh rơtăm ai ivá khu 1 ƀă khu 2 châ lối 64%; kơxô̆ droh rơtăm hriâm Trung hok phôh thong châ 36%; trung kâp, kao đăng ƀă đăi hok châ 7,5%. 

Tung kơxô̆ ki kố, ai 22 ngế lêng nếo cho đảng viên, vâ chê 34% ngế lêng nếo cho kuăn ‘nĕng hdroâng kuăn ngo. Rơtế ƀă mâu droh rơtăm lăm pro lêng, roh kố hên droh rơtăm ki má môi kong pơlê Lâm Đồng xuân lăm pro lêng kŏng an. A leh pơcháu tơdah, khu râ kăn pơkuâ kong pơlê Lâm Đồng ƀă mâu tơring, pơlê kong kơdrâm tung kong pơlê hiăng diâp reăng, mơhnhôk mâu lêng nếo mơnhông khôi túa vâi krâ nah khên tơnôu dêi hdroâng mơngế, pơtối hvêa chêng prôk dêi pâ pôa lăm pêi hnoăng cheăng krih tơviah ƀă Tơnêi têa.

Hdrối mê, mâu tơring dêi kong pơlê Lâm Đồng xuân tơkŭm po mơdĭng lăm pro lêng; lăm pôu, diâp kơxuô tơmeăm ƀă mơhnhôk mâu lêng nếo.