Tiô riên, rêm ngế kŏng nhân dế tro tíu pêi cheăng ối chěn liăn khế sap 30 rơtuh liăn troh 50 rơtuh liăn. Pôa Lê Tấn Thanh, ối a cheăm Dak Wer, tơring Dak Rlâp, kong pơlê Dak Nông ăm ‘nâi: A khế 10/2023, pôa tăng vâ chê 70 ngế kŏng nhân ing mâu kong pơlê: Dak Nông, Phú yên, Bình Phước ƀă mâu kong pơlê Miền Tây lăm veăng pêi cheăng pro kơdroăng kân păn chu. Troh nôkố hiăng vâ chê 4 khế, tíu pêi cheăng kố xo mung bú ăm liăn nếo môi iâ tê. Pôa Thanh hiăng hên hdroh krếo pâ dêi liăn la bú tâng tiâ tơhrâ tê:

“Nôkố a mơ’drêh mâu nhŏng o ki pêi cheăng hiăng to lâi khế kô, sap hâi lơ 16/10/2023 troh nôkố, ai môi rôh peăng Kŏng ti Vương Anh Thắng ai mung ăm hdrối 600 rơtuh liăn, ta troh nôkố liăn kŏng nhân ƀă tá liăn mung rôe tơmeăm dâng 3 rơtal 2 hrĭng rơtuh nếo. A ai môi hdroh tơpui tơno kơ-êng ngế pơkuâ xiâm, vâi tơhrâ kơ ai a hâi lơ 20/12 mâu nhŏng o mơ-eăm pêi tâi măng tĭng ah kô ai liăn hmếo pơ tơhrâ tiah mê, drêng kô ôh tá ai, drêng ê ah ai, nếo bê ta troh nôkố á xuân hâi ai liăn, ôh tá kâi mơdrêh dêi mâu nhŏng o xếo. Púi vâ khu râ pơkuâ cheăng pro ti lâi veăng kum pro tơ’lêi hlâu vâ á ai liăn vâ ăm tơná mâu nhŏng o vâi vâ vêh kâ tết. Tŭm tơdroăng ki ê xo ah hmôi săm phoăng kô ‘nâi ngế ki lâi ‘ló ngế ki lâi ôh, xua kố hiăng tâi hâi, Têt hiăng vâ chê troh há, mâu nhŏng o thế vêh kâ Têt’’.

Môi tiah mê, ngoh Trần Mih Hướng (pơlê xiâm Tây Ninh) xuân djâ mâu nhŏng o a pơlê lăm pêi cheăng păn chu. Lối 3 khế kố, tơná ngoh Hướng ƀă mâu nhŏng o dế chěn vâ chê 500 rơtuh liăn khế.

“Troh akố hiăng 3 khế, apoăng nếo hlo ai péa chât ngế, nôkố nhŏng o hiăng vêh tâi ối 8 ngế, ôh tá ai liăn, ôh tá ‘nâi xo liăn ulâi vâ ăm mâu nhŏng o vêh a pơlê. Tâng riân cho nhŏng o veăng kum liăn khế 12 rơtuh, mâu ngế pêi cheăng pro ki kố ki mê ai 15 rơtuh, púi vâ ai liăn vâ mâu nhŏng o vêh dêi a pơlê, nôkố ‘nâi pro ti lâi vâ mâu nhŏng o châ vêh’’.

Pôa Hồ Công Anh Tuấn, ối a tơring Chư Sê, kong pơlê Gia Lai, xo pro 6 kơdroăng păn chu kăn a kŏng trường xuân tung pơla dế trâm pá môi tiah mê:

“Hiăng pái khế kố xuân hâi ăm nhŏng o kŏng nhân liăn. Ki kal cho peăng ngế pơkuâ ‘no liăn pro Khu ki thế mơjiâng pro ki xiâm gá ti lâi mê á ôh ti ‘nâi nhên. La nôkố kơ-êng Vương Anh Thắng (tíu pêi cheăng mơjiâng pro) vâi mơnĕn cho khu ki xo hnoăng ‘no liăn mơjiâng pro, cho ngế kăn pơkuâ pro hâi vâ ăm liăn. La nôkố ki khât gá a bú kĭ tơhrâ ƀă Vương Anh Thắng, ki khât gá a ôh tá ‘nâi ngế ki lâi xiâm ki pơkuâ ‘no liăn thế pro cho kơbố. Púi vâ ai troăng rơhlâ pêi ki lâi tro má môi thế ai tŭm liăn khế ăm kŏng nhân ăm nhŏng o ki ối a hngêi, vâ tối mâu ngế akố pêi hiăng 3 khế kố, a hngêi vâi ối ai kơdrâi kuăn ‘nĕng nếo, nôkố ôh tá ai liăn hlối hiăng chê Têt há vâi ôh tá ai liăn vâ to rơxế vêh, hơ-ui vâi há’’.

Tơdroăng Tơkêa bro kơdroăng păn chu kăn a thôn Cây Xoài (cheăm Ia Hlá, tơring Chư Pưh, kong pơlê Gia Lai) châ mơjiâng pro a khế 1/2023, xua Kŏng ti pêi cheăng tiô rơnó Môi tung khu Phát Tài Gia Lai pro xiâm pơkuâ ‘no liăn pro. Tâi tâng kơxô̆ liăn ‘no pêi tơdroăng tơkêa bro 80 rơtal liăn, Kŏng ti Pêi cheăng tiô rơnó Vương Anh Thắng cho tíu xiâm pêi cheăng mơjiâng pro.

Tơdroăng hrá ăm liăn khế kơ mâu kŏng nhân a công trường, cho xua Kŏng ti pêi cheăng tiô rơnó MTV Phát Tài Gia Lai ƀă tíu pêi cheăng mơjiâng pro, Kŏng ti pêi cheăng Tiô rơnó Vương Anh Thắng ai hên tơdroăng ki tơvâ tơvân ki pá puât tơdjâk troh tơdroăng pro xôi pơkâ tiô tơdroăng kĭ tơhrâ tung hơp đong ki rêm pâ hiăng kĭ hdrối nah.

Xua hâi môi tuăn dêi rơpó tung tơdroăng cheăng, mê xuân hâi vâ môi tuăn tơdjuôm ‘na mâu tơdroăng cheăng pêi, mê péa hngêi rak liăn hâi vâ ăm xo liăn pro pá chiâng chěn liăn khế ăm mâu kŏng nhân tung pơla hên khế. 

Pôa Rahlan Hoen, kăn hnê ngăn Vi ƀan cheăm Ia Hlă ăm ‘nâi, Vi ƀan cheăm nếo ‘nâi mâu tơdroăng chât ngế kŏng nhân tro chěn liăn khế. Ki hdrối, Vi ƀan hnê ngăn cheăm hiăng thế mâu kŏng an tăng ‘nâi plĕng mâu tơdroăng ƀă thế rak tơniăn. Pakĭng mê, kô tối ăm rêm pâ ki tơdjâk troh tơleăng mơnhên klêi mâu tơdroăng ki pro pá ăm kuăn pơlê. Klêi mê kô tối tơbleăng troh Vi ƀan tơring Chư Pưh ƀă mâu kơvâ cheăng ki tơdjâk troh ‘na tơdroăng mê.