Tơdroăng kố châ tơkŭm po a kơpong troăng Anh hùng Núp ƀă Plông kan Đại Đoàn Kết, pơlê kong kơdrâm Pleiku, môi tíu ki tơ’lêi hlâu vâ tơdjâk tơdroăng ‘na ki kơnía dêi kơphế Gia Lai. 40 khu mơdró kâ ƀă mâu rơpŏng kuăn pơlê ki pêt kơphế tung tíu ki ai kơbong mơđah tơbleăng tê tơmeăm xiâm a rôh po tơdroăng kố ƀă púi vâ tơdjuôm ivá mơnhông mâu tơdroăng ki kơnía krê dêi kơphế Gia Lai. Jâ Nguyễn Thị Nga, phŏ kăn pơkuâ Khu pêi cheăng tơrŭm pêi chiâk Tê mơdró Nam Giang, tối:

“Ing tơdroăng kố, ngin púi vâ mơđah tơbleăng kơphế Đăk Yang tối krê ƀă kơphế Gia Lai tối tơdjuôm troh ƀă mâu vâi pú tung tơnêi têa ƀă lâp plâi tơnêi, ăm kơphế Gia Lai tâk troh a môi troăng ki nếo. Kơphế kơhiâm lĕm”.

Ƀă ki xiâm mơdêk kơphế a kong pơlê, Gia Lai Coffee Festival  tơkŭm tung mâu tơdroăng ki ôu mơnúa ngăn môi tiah: mơnúa dêl ngăn kơphế lĕm, rah xo kơphế kơphế; mơđah tơbleăng kih thuât kơ-óu ƀă pro; tơ’noăng pro hơ’lâh kơphế vâ ôu ƀă trâm mâ-tơpui tơno tơdjêp kơvâ kơphế ƀă hên ki ê. Jâ Nguyễn Thị Thanh Tâm, Ngế xiâm pơkuâ Khu tơkŭm po, tối:

“Gia Lai Coffee Festival cho môi tơdroăng tơdjuôm ƀă tâi tâng mâu tơdroăng châ tơkŭm po a rôh po tơdroăng kố kô châ tơkŭm po tiô conxcept cho sap ing chiâk pêt kơphế troh kơ’lo kơphế. Púi vâ cho kơpong pêt kơphế dâi lĕm, Gia Lai châ rế hía rế ‘nâi troh hên tâ, tơdrêng amê hlối cho kơlo ki tơdjâk ƀă tơdjêp dêi mâu kuăn pơlê pêi chiâk rế hía rế rơdêi tâ ƀă hê̆ sinh thái kơphế a kong pơlê gá xuân mơnhông tiô túa ki krá tơniăn”.

Klêi kơ’nâi rôh apoăng tơkŭm po ƀlêi chiâng a hơnăm 2023, hơnăm kố Gia Lai Coffee Festival ai tơdroăng cheăng tơkŭm po hên tâ; cho tíu ki mơngế ôu tăng ‘nâi ‘na pơ’leăng kơphế ƀă tơdroăng hơ’muăn tâ tá tơmeăm xiâm dêi kong pơlê. Tiô ngoh Nguyễn Văn Hòa, Ngế teăng mâ ƀơrô cheăng Lab ối tung Viê̆n dâi lĕm kơphế lâp plâi tơnêi a Việt Nam, tơdroăng kố dế ôh tá la lâi pơtê tơná, mơhno djâ tơdroăng hâk vâ ăm mâu ngế ki hâk vâ kơphế Gia Lai mơeăm troh tơdroăng ki hên hĭn tâ ƀă dâi lĕm tâ:

“Nôkố, á dế pơkuâ kơvâ mơnúa ôu ngăn ƀă mơnhên tối ki dâi lĕm kơphế lối 48 túa dêi kong pơlê Gia Lai vâ rah xo mâu túa ki xiâm vâ tung hơnăm la ngiâ kô ‘măn kơdĭng rôh tơ’noăng kơphế lĕm Gia Lai. Pro tiah lâi vâ hnê pơtó tơdroăng hâk vâ, mơeăm ƀă ivá ối nếo, tơdroăng hâk vâ ƀă tơdroăng ki mơeăm khât vâ mơnhông kơphế a Gia Lai”.