Ô vâi krâ nhŏng o ƀă pú hmâ! Kơxo kố lơ 24/5, a Hngêi mơdâm kiâ Tơnêi têa, kơxô̆ 5 Trần Thánh Tông, pơlê kong kân Hà Nội, Khu pơkuâ Xiâm Đảng Kŏng san Việt Nam, Kuô̆k hô̆i tơnêi têa Kŏng hòa xah hô̆i chuh ngiah Việt Nam, Kăn xiâm hnê ngăn tơnêi têa Kŏng hòa xah hô̆i chuh ngiah Việt Nam, Chin phuh tơnêi têa Kŏng hòa xah hô̆i chuh nghiah Việt Nam, Vi ƀan xiâm Măt trâ̆n Tơnêi têa Việt Nam tơkŭm po Leh mơdâm pôa Trần Đức Lương, Kăn xiâm hnê ngăn tơnêi têa hneăng hdrối tiô tơdroăng mơdâm kiâ Tơnêi têa.

Pơkuâ djâ mot pôu ngăn, Khu pơkuâ xiâm Đảng Kŏng san Việt Nam xua pôa Tô Lâm, Kăn xiâm pơkuâ hnê ngăn cheăng Đảng, pro ngế xiâm pơkuâ djâ khu kăn kố mot ngăn pôa Trần Đức Lương, Kăn xiâm hnê ngăn tơnêi têa hneăng hdrối.

Pơ’lâng pôa Trần Đức Lương, Kăn xiâm hnê ngăn tơnêi têa hneăng hdrối, pôa Tô Lâm, Kăn xiâm pơkuâ hnê ngăn cheăng Đảng chêh tung sôh mơdâm kiâ: “Mơjo khéa hơ’nêng khât yôh kơ pôa Trần Đức Lương, ngế đảng viên Kŏng san tơdrăng, ngế kăn pơkuâ ki kơhnâ rơkê, djâ troăng ahdrối, ngế kuăn kơhnâ rơkê dêi pơlê xiâm Quảng Ngãi khên tơnôu, kro mơdrŏng tơdroăng kăch măng.

Pôa Trần Đức Lương hiăng pleăng plâ rơxông dêi tơná ăm tơdroăng cheăng kăch măng dêi Đảng ƀă hdroâng mơngế. Tung mâu hnoăng cheăng pêi dêi tơná, pôa đi đo mơhno ivá khên tơnôu kal kí krá rơdêi, túa rêh ối lĕm tro krúa lĕm, ai túa pêi cheăng rơkê, kơhnâ krâu; ai tơdroăng rêh ối têm rơpiât, hmâ achê ƀă mâu vâi pú, nhŏng o, ƀă kuăn pơlê châ mâu vâi pú, mâu nhŏng o mâu pú hmâ ƀă kuăn pơlê pâ nhuô̆m.

 Pôa hía lôi cho môi tơdroăng ki hía lôi kân ƀă Đảng, Tơnêi têa ƀă kuăn pơlê pin. Pâ tu ko tơná a châ pôa ƀă pâ pơtroh troh rơpŏng hngêi pôa tơdroăng ki sĭng khéa ó khât”.

Khu kăn xiâm hnê ngăn tơnêi têa Kŏng hòa xah hô̆i chuh nghiah Việt Nam xua pôa Lương Cường, Ngế cheăng tung khu xiâm kal kí, Kăn xiâm hnê ngăn tơnêi têa Kŏng hòa xah hô̆i chuh ngiah Việt Nam, pro ngế xiâm pơkuâ djâ khu kăn kố mot ngăn pôa Trần Đức Lương, Kăn xiâm hnê ngăn tơnêi têa hneăng hdrối. Khu kăn Chin phuh tơnêi têa Kŏng hòa xah hô̆i chuh nghiah Việt Nam xua pôa Phạm Minh Chính, Ngế cheăng tung khu xiâm kal kí, Ngế pro xiâm hnê ngăn Chin phuh tơnêi têa Kŏng hòa xah hô̆i chuh ngiah Việt Nam, pro ngế pro xiâm pơkuâ djâ khu kăn kố mot ngăn pôa Trần Đức Lương, Kăn xiâm hnê ngăn tơnêi têa hneăng hdrối.

Khu kăn Kuô̆k hô̆i tơnêi têa Kŏng hòa xah hô̆i chuh ngiah Việt Nam xua pôa Trần Thanh Mẫn, Ngế cheăng tung Khu xiâm kal kí, Kăn xiâm hnê ngăn Kuô̆k hô̆i tơnêi têa Kŏng hòa xah hô̆i chuh ngiah Việt Nam, pro ngế xiâm pơkuâ djâ khu kăn kố mot ngăn pôa Trần Đức Lương, kăn xiâm hnê ngăn tơnêi têa hneăng hdrối.

Khu Vi ƀan xiâm Măt trâ̆n tơnêi têa Việt Nam xua pôa Đỗ Văn Chiến, Ngế cheăng tung khu xiâm kal kí, Kăn pơkuâ tíu xiâm Đảng, Kăn xiâm hnê ngăn Vi ƀan Măt trâ̆n Tơnêi têa Việt Nam, pro ngế xiâm pơkuâ djâ khu kăn kố mot ngăn pôa Trần Đức Lương, Kăn xiâm hnê ngăn tơnêi têa hneăng hdrối.

Leh pơchuât tơbleăng hnoăng pôa Trần Đức Lương châ tơkŭm po kân krip a 7 chôu hâi lơ 25 khế 5 hơnăm 2025 a Hngêi mơdâm kiâ Tơnêi têa, kơxô̆ 5 Trần Thánh Tông, pơlê kong kân Hà Nội. Leh ‘mế a 15 chôu rơtế tung hâi a ilâng kiâ pơlê xiâm dêi pôa a cheăm Phổ Khánh, pơlê kong krâm Đức Phổ, kong pơlê Quảng Ngãi.