Hdrối hâi ki lăm a pơlê kong kân Hồ Chí Minh veăng hôp a Hneăng hôp Droh rơtăm rơkê plĕng pêi tiô rơkong Pôa hnê tung lâp tơnêi têa rôh má 8, hơnăm 2025, Kpuih Hmin xuân dế ối koi riu má, lo a kơdrum kơxu vâ hnê kih thuât kúa chhá, hnê nhên ăm mâu khu kúa ki nếo. Hiâm mơno hâk kơhnâ dêi ngế kăn pơkuâ chi đoàn hiăng hnê tối tơdroăng ki hâk vâ ăm mâu droh rơtăm. Kŏng nhân hơnăm ối nếo Siu Pốp ăm ‘nâi:

“Kpuih HMin cho kŏng nhân rơkê, hnê tơdjâ ngin tung tơdroăng ki kúa chhá kơxu hlo tơƀrê khât. Ngin hriâm ƀối ƀă xúa tro ƀă tơ’lêi hlâu khât. Pơtih Kpuih HMin hnê kih thuât kúa chhá kơxu vâ chhá lo hên mê athế ngăn hlo troăng kúa pôi tá kúa trâu; troăng kŭn la chhá lo hên, dâi lĕm. Pakĭng mê, HMin xuân ối pro, pơhlêh tơ’moê loăng hếo ki xŏn vâ kŏng nhân xúa xôh pơkeăng kích thích ƀă pơkeăng  hbrâ mơdât pơreăng kâ ‘nhiê a loăng kơxu a mâu tíu ki pá ki ing ton nah ôh tá chiâng pêi. HMin cho ngế ki djâ troăng ahdrối dêi đoân viên droh rơtăm kúa chhá kơxu rơkê ƀă kơhnâ hnê ăm rêm ngế ngin tung tơdroăng cheăng”.

Kơhnâ, tơmiât pêi rơkê tung pêi cheăng xuân môi tiah tơdroăng cheăng droh rơtăm, mâu ivá veăng gum dêi Kpuih HMin mâu hơnăm hdrối châ mâu kơvâ cheăng, rêm râ tơmâng xo. Kơhnâ rơkê cho inâi “Droh rơtăm kơhnâ rơkê pêi tiô rơkong Pôa hnê” râ kong pơlê pơla hơnăm 2023 – 2025; Ngế tơ’noăng Râ kong pơlê hên hơnăm hdrối. Ngoh châ Tíu xiâm đoân diâp Ƀâng khĕn kơdeăn hơnăm 2022, châ Inâi “Kơpeăng kŏng mêa” Rôh tơ’noăng kơvâ kúa chhá kơxu hơnăm 2024.

Malối, hơnăm kố, Kpuih HMin hâk tơngăm cho ngế ki veăng hôp a Hneăng Droh rơtăm kơhnâ rơkê pêi tiô rơkong Pôa hnê lâp tơnêi têa rôh má 8. Kpuih HMin tối:

“Sap ing rôh ki á mot pro kŏng nhân, mot tung Đoân Droh rơtăm Kŏng san Hồ Chí Minh ƀă pro kăn pơkuâ ngăn đoân dêi Nông trường. Á hiăng tơkŭm mâu đoân viên veăng pêi hên tơdroăng cheăng ki ai pơxúa, mơhnhôk hiâm mơno kơhnâ pêi cheăng. Mơ-eăm hriâm tâp tiô troăng tơdjâ Pôa Hồ, á hiăng kơhnâ pêi tiô troăng tơdjâ dêi Kŏng ti tung kúa chhá kơxu, veăng tơ’noăng mâu ngế ki kúa chhá kơxu rơkê hiăng châ kâ pri ƀă ai ƀang khê̆n kơdeăn, tơná á phiu ro ƀă hâk tơngăm khât. Cho đoân viên droh rơtăm mê á pơtối mơ-eăm pêi cheăng tro tâ, rơtế ƀă đoân viên droh rơtăm tung đô̆i tơrŭm, pôi tá la lâi pơtê hriâm tâp mơ-eăm tơchĕng tơmiât pêi rơkê vâ ai hên tơdroăng ki rơkê plĕng tâ”.

Pôa Trần Quang Huấn – Cán bộ Đội Sản xuất cao su Hòa Bình, Kŏng ti pêi cheăng tiô rơnó môi tung khu Cao su Chư Prông ăm ‘nâi, Kpuih HMin kơhnâ veăng tơkŭm po mâu tơdroăng cheăng. Ƀă hnoăng cheăng cho ngế pơkuâ ngăn chi đoân ngoh hiăng ai hên tơdroăng pêi pro ki kơhnâ rơkê ƀă ai pơxúa gum đoân viên droh rơtăm mơdêk dêi tơdroăng cheăng, thăm mơnhông ki dâi lĕm dêi kơdrum loăng; kơnôm mê ai liăn pêi lo tơniăn.

Pakĭng tơdah xo rak ngăn kúa chhá kơxu dêi Kŏng ti, Kpuih HMin ối mơ-eăm pêi cheăng kâ rơpŏng hngêi. Ngin hiăng ‘măn kơdĭng liăn vâ roê tơnêi ƀă pêt châ vâ chê 1 ha kơphế. Pôa Trần Quang Huấn ăm ‘nâi:

“Kpuih HMin cho kăn pơkuâ chi đoân kơhnâ rơkê. Cho kuăn pơlê hdroâng kuăn ngo, tơdroăng rêh ối rơpŏng hngêi xơpá, la ƀă ivá mơ-eăm kơhnâ, chiu pá, tơdroăng rêh ối rơpŏng hngêi xơpá, ngoh đi đo tăng ‘nâi, hriâm ƀối, mơdêk tơdroăng cheăng pêi rơkê. Tung pêi cheăng mê ngoh đi đo djâ troăng ahdrối ƀă hiăng kâ hên pri sap ing nông trường, kŏng ti ƀă grup pơkuâ”.

Ƀă tơdroăng mơ-eăm ôh tá la lâi pơtê, Kpuih HMin cho ngế ki djâ troăng ahdrối tung kơpong hdroâng kuăn ngo a Ia Vêr, tơring Čư̆ Prông, kong pơlê Gia Lai. Tơngah tiah kố, sap ing tơdroăng dêi Kpuih HMin, kô ai hên droh rơtăm, malối cho droh rơtăm hdroâng kuăn ngo, mơeăm tung hriâm tâp, pêi cheăng ƀă veăng gum ăm tơdroăng mơnhông mơdêk dêi pơlê cheăm, tơnêi têa.

Ngoh Đỗ Đức Thanh, phŏ kăn pơkuâ ngăn Đoân Droh rơtăm kong pơlê Gia Lai ăm ‘nâi, tung mâu hơnăm hdrối mê hía nah a kong pơlê hiăng ai lối 400 ngế droh rơtăm kơhnâ rơkê tung mâu kơvâ pêi cheăng. Tung mê, ai hên droh rơtăm a thôn pơlê, kuăn pơlê hdroâng kuăn ngo tơxâng châ khĕn kơdeăn, mơhnhôk.

“Ngin hiăng rah xo mâu droh rơtăm ki kơhnâ rơkê, ai hiâm mơno mơ-eăm vâ pêi cheăng kâ, tơkâ luâ mâu xơpá vâ tŏng gum tơdroăng rêh kâ ối ăm mâu vâi pú. Pakĭng mâu tơdroăng cheăng vâ mơdêk khôi túa lĕm tro hdroâng kuăn ngo. Mê cho tơkŭm po tŏn chêng koăng, tơkŭm po mâu tơdroăng xah hêi ki hơniâp ro ăm droh rơtăm hdroâng kuăn ngo, droh tăm ki tiô khôp. Ing mâu tơdroăng ki châ tơkŭm po mê, ngin hiăng hnê tối mâu tơdroăng ki kal ‘na hriâm tâp ƀă pêi pro tiô troăng tơdjâ hiâm mơno Hồ Chí Minh”.