Ing mê, pơla hơnăm 2023-2025, lâp tung kong pơlê mơ-eăm ai tơ’nôm 186 thôn, pơlê châ mơnhên thôn pơlê nếo. A tơring tơkăng kong Chư Prông, tung 6 hơnăm hdrối hiăng mơhnhôk châ lối 600 rơtal liăn ing mâu tơdroăng, tơdroăng tơkêa bro pêi tơdjuôm tung mơjiâng Thôn pơlê pêi cheăng kâ tiô túa nếo.

Pơlê O Ngol, cheăm Ia Vê cho môi tung mâu tíu ki vâ mơhno, hiăng châ mơnhên tối thôn pơlê cheăng kâ rêh ối tiô túa nếo râ tơring. Pôa Siu Huỳnh - Kăn hnê ngăn Chi ƀô̆ hlối pro Ngế pơkuâ pơlê O Ngol ăm ‘nâi, pơlê kố ai vâ chê 120 rơpŏng, ƀă vâ chê 500 pơ’leăng mâ mơngế, tâi tâng to kuăn ngo Jarai. Kơnôm pêi tơdroăng mơjiâng thôn pơlê nếo mê tơdroăng rêh ối dêi kuăn pơlê hiăng pơ’lêh ƀă kal thế rak krá mâu  tơdroăng pơkâ.

“Pơlê ngin pêi pro tiô pơkâ mơjiâng thôn pơlê  rêh ối cheăng kâ tiô túa nếo, hiăng pêi cheăng tro tiô pơkâ thôn pơlê pêi cheăng kâ tiô túa nếo râ tơring. Ƀă hnoăng cheăng cho Kăn hnê ngăn Chi ƀô̆ hlối pro Thôn trưởng, a hnê mơhnhôk kuăn pơlê meăm rak vế hnoăng hiăng pêi lĕm tro ki pơlê hiăng pêi pro. Hâk tơngăm tơring châ rah pro tíu xiâm vêh lăm ngăn “thôn pơlê pêi cheăng kâ tiô túa nếo kơhnâ rơkê”, tâi tâng kuăn pơlê thế mơ-eăm pơtối rak vế, tơdjuôm ivá pro troăng, pro kơnâng, pro kơdrum hngêi krúa lĕm, klông troăng krúa lĕm bâ phuâng. Malối, pơlê ngin hiăng ai on trâ eăng troăng pơlê ƀă ai 34 kơtâ hmốu on tơhrik ki hrik  ing mâ hâi. Ngin phiu ro ƀă hâk tơngăm, xua kuăn pơlê, pú hmâ tíu ki ê troh lăm ngăn, ngê ki lâi kô tối pơlê ngin a kơmăng ai on lĕm bâ eăng troăng pơlê prôk vêh tơ’lêi tơniăn’’.