A hơnăm vâ chê 80 hơnăm mô đô̆i hneăng hdrối nah Lê Trương Thận, ối a cheăm Čư Êwi, tơring Čư Kuiñ xuân ối rơdêi, chiâng xúa phôn râng kŏng vâ tiê dêi kơmăi tôh têa kơdĭng ăm kơdrum loăng plâi dêi tơná. Kơmăng pôa xuân krâ on tiê a ko mơ'ruih dêi reăng klêh a tơxui ăm kơ'muăn plâi sầu riêng. Kơxo má kơhnâ lăm rak ngăn dêi kơdrum plâi treăng kêt dro hiăng vâ châ krí. Pôa Thân tối ăm ‘nâi, pôa mơjiâng cheăng pêi a kơpong pơlê xiâm nếo Dak Lak bu sap ing 3 sao tơnêi ôh tá hơpok lĕm. Laga nôkố, rơpŏng pôa hiăng pêt hên loăng plâi kâ tung 2ha, pêi lo liăn rêm hơnăm pá kơdâm môi rơtal liăn.

‘’Á cho ngế lêng xua mê mơnhông hơnun Mô đô̆i Pôa Hồ, khŏm tah lôi pá puât, lơ Khu pơkuâ mô đô̆i hneăng hdrối nah lơ Khu mơhnhôk pêi chiâk deăng ai tơkŭm po lâm ki lâi cho veăng lâm ki mê, tá pêt loăng plâi ƀă păn mơnăn mơnôa. Mơ-eăm troh nôkố hiăng ai 2 ha, djâ mâu loăng plâi pêt, hên má môi cho ƀăng deăng plâi sầu riêng, hơnăm kố pêi lo châ dâng lối 100 xiâm loăng, lơ môi tiah plâi treăng kêt dro xuân châ dâng 5 – 6 tâ̆n, plâi treăng trí hơnăm kố 50 xiâm kŭn pơxiâm vâ châ krí tê’’.

A tơring Čư Kuiñ, kong pơlê Dak Lak, mâu mô đô̆i hneăng hdrối nah pêi lo liăn châ rơtal môi tiah pôa Thận cho ai hên. Mô đô̆i hneăng hdrối nah Nguyễn Trung Thành, ối a thôn 7, cheăm Ea Ning, xuân cho môi ngế ki má môi ai pêi lo liăn lối 1 rơtal liăn rêm hơnăm sap ing tơdroăng pêt loăng plâi kâ – păn mơnăn mơnôa há.

‘’Pu pái păn sap ing 180 – 220 to, ki ê pêt lối 2ha kơphế, plâi treăng trí, tiu, sầu riêng, hlối păn mơnăn vâ xo eâk pu pái rơvât loăng plâi ton hâi, plâi kâ. Xuân ing ngế lêng Mô đô̆i Pôa Hồ mê á tâ hôm tâ ngế ki ê, cho ngế ki chía tâ iâ kum ngế ki pá puât tâ. Kơtăn kố 2 hơnăm á xuân ai kum 2 rơpŏng mô đô̆i hneăng hdrối nah a thôn 7 kố 60 rơtuh liăn ôh tá xo liăn rơkâ, vâ vâi rế păn mơnăn mơnôa rế mơ’no liăn pêt mơjiâng tơmeăm’’.

Pakĭng mâu ngế krê tŏng gum ăm rêm ngế, vâ rơtế tŏng gum mô đô̆i hneăng hdrối nah rơpŏng kơtiê ƀă vâ chê kơtiê, sap hơnăm 2013 troh nôkố, mâu khu râ mô khu pơkuâ mô đô̆i hneăng hdrối nah tơring Čư Kuin hiăng veăng kum lối 800 rơtuh liăn vâ rôe lối 40 to ro ƀă pro 8 phĭu mơ-éa kơdĭng liăn diâp ăm mâu mô đô̆i ki pá puât; mơjiâng kơxô̆ liăn khu châ lối 6 rơtal liăn ăm lối 300 ngế mô đô̆i hneăng hdrối nah mung ƀă liăn rơkâ kơjo. Kơnôm mê, troh nôkố lâp tơring bu u ối 20 rơpŏng mô đô̆i hneăng hdrối nah ối tung rơpŏng kơtiê ƀă vâ chê kơtiê.

Tiô pôa Võ Công Tường, Phŏ Kăn hnê ngăn Khu mô đô̆i hneăng hdrối nah tơring Čư Kuin, tung kơxô̆ vâ chê 2.900 ngế mô đô̆i hneăng hdrối nah a Čư Kuin, ai troh lối tơdế cho rơpŏng kro mơdrŏng ƀă hôm khât. Kố chiâng mâu ngế ki má môi, kơhnâ tung mơnhông cheăng kâ rơpŏng ƀă veăng mâu tơdroăng pêi a tơring, veăng kum ivá mơngế dêi tơdroăng mơjiâng thôn pơlê nếo.

Tung mâu hơnăm hiăng hluâ, kăn ƀô̆ mô đô̆i hneăng hdrối nah lâp tơring hiăng vâ xêh pleăng lối 10ha tơnêi ƀă rơtal liăn mâ vâ pro troăng prôk, veăng kum rơtế tơring cheăm pro tơ’lêi hlâu ăm kuăn pơlê prôk lăm. Ai khu mô đô̆i hneăng hdrối nah veăng kum hrĭng rơtuh liăn.

‘’Mâu khu pú djâ troăng ahdrối, ki rơhêng vâ tối tung tơdroăng mơjiâng mâu troăng pêi cheăng kâ, mơnhông pêt mơjiâng tơmeăm. Mơhé môi tiah lâi mâu khu pú xuân mơnhông lĕm tro khôi túa vâi krâ nah ‘’Mô đô̆i Pôa Hồ’’, mơjiâng lĕm mâu troăng pêi cheăng kâ, pro tơdroăng ki xiâm vâ mơhnhôk, mơhnhôk thế mâu khu ki ê thăm pêt mơjiâng tơmeăm ƀă mơnhông cheăng kâ. Mơhé pôu râng hnoăng cheăng ki lâi xuân kêi đeăng hnoăng cheăng dêi tơná’’.

Lo ing ối pêi cheăng tung khu lêng, mâu mô đô̆i hneăng hdrối nah tơring Čư Kuiñ, kong pơlê Dak Lak xuân rak hơnun ‘’Mô đô̆i Pôa Hồ’’ – khŏm mơ-eăm, pôu râng hnoăng cheăng, tơdroăng tuăn pâ. Tung tơdroăng cheăng kâ, vâi pơtối cho mâu ngế djâ troăng ahdrối, pro kro mơdrŏng tơxâng, tơdrêng amê troh lâp lu tơdroăng tơrŭm môi tuăn, gum dêi pó tung pơlê pơla, rêh ối tŭm tâi tâng tuăn pâ khu pú mô đô̆i.