Sap ing tơdế khế 4, mâu tíu ki ăm tơmối ối pơtê ƀă tâi tâng cho lối 2 rơpâu kơbong a pơlê kân Mang Deang, tơring Kon Plông, kong pơlê Kon Tum hiăng châ tơmối ôm hyô kok ăm rôh leh pơtê lơ 30/4 ƀă lơ 1/5. Tung tơdroăng ki hlo hơniâp ro dêi tơmối ôm hyô Mang Deang nôkố, xơpá vâ ‘nâi túa ki kố ôh ti ton, kơpong tơnêi 7 to long 3 to xí nah ôh ti ai kli klâi, ki hên cho troăng prôk ki kŭn ƀă ai to plêm ƀă rối trĭng jôm kâ. Tơkâ luâ mâu rôh ki xơpá Mang Deang rế hía rế tối rơdêi dêi inâi tơná chiâng môi tíu tơkŭm troh tung rôh ki tí tăng ‘nâi plĕng Tây Nguyên krip tơdrŏm dêi mâu tơmối achê hngế. Pôa Nguyễn Xuân Hùng, môi ngế tơmối lo ing Pơlê kong xiâm Hà Nội hâk phiu drêng vêh ƀă Mang Deang:

“Á a Mang Deang xuân hiăng hên xôh châ mơnúa ngăn mâu kong prâi tơnêi tơníu ƀă kâ mâu kế kâ dêi kơpong kố pơchên. Mang Deang rơmuăn lĕm môi tiah môi ngế droh nếo 18 hơnăm mê vâ tơdah tâi tâng mâu vâi rơtăm tung lâp kơpong dêi tơnêi têa troh akố châ ngăn kong kế ki lĕm dêi Mang Deang kố. Môi hơnăm athế mơeăm troh akố 2 troh 3 xôh vâ ro ƀă mâu vâi pú a tơnêi Mang Deang kố”

Pái hơnăm a chê kố ôm hyô Mang Deang - Kon Plông đi đo a kơlo ki mơnhông rơdêi, rêm hơnăm pơrá tơdah tơ’nôm lối hrĭng rơpâu hdroh ngế tơmối troh ôm hyô. Mâu khu ki ‘no liăn pro cuân môi tiah tơmối ôh ti la lâi pơtê tăng ‘nâi troh kơpong tơnêi kố ƀă kố cho ivá vâ Mang Deang pơhlêh rêm hâi.

Vâ pro tơ’nôm ivá tơ’mot ăm Mang Deang a lơgât ôm hyô, tung mâu hơnăm hdrối kong pơlê Kon Tum hiăng kơjo gum ‘no liăn pro hngêi trăng troăng klông, hnê mâu ngế cheăng ƀă thăm mơnhông mơđah tơbleăng, tơdjêp mơjiâng châ mâu tíu tơdjêp ôm hyôu tung xuân môi tiah kong têa ki ê. Pôa Đặng Đình Toán, ngế xiâm pơkuâ ƀơro cheăng Túa lĕm tro, Khoa hok ƀă Um tơvi tơring Kon Plông, ăm ‘nâi, ƀă túa tơmiât mơnhông ôm hyô krá tơniăn tro ƀă rak vế ƀă mơnhông mâu tơdroăng ki kơnía ‘na túa lĕm tro khôi hmâ dêi hdroâng kuăn ngo akố, tơring hiăng mơjiâng pro hngêi trăng troăng klông vâ gum ăm tơmối.

“Troh nôkố ngin hiăng ai lối 142 tíu ối pơtê. Xiâm cho xua tơná kuăn pơlê hdroâng kuăn ngo hiăng ‘nâi mơjiâng pro ki pơxúa dêi rơpŏng hngêi ƀă toăng hngêi dêi tơná sap ing mê mơjiâng pro ôm hyô. ‘Na tơdroăng ki tê mơdró tơmeăm ôm hyô ngin tơtrŏng tung mâu tơmeăm pêi lo ing chiâk deăng xúa kơmăi kơmok rơxông nếo ƀă mâu tơmeăm ‘na túa lĕm tro, môi tiah po kơchô Mang Deang, Kơpong cheăng kâ kong măng, Kơdrum ngê̆ thuât Mang Deang. Tơmeăm ôm hyô ki ngin tơmiât troh mê cho tơmeăm ôm hyô ‘na kong kế nhâ loăng”.

Rơtế ƀă tơdroăng ki mơnhông ivá tung tơring, kơpong tơnêi 7 to long 3 to xí nah kố ƀă ôm hyô Mang Deang – Kon Plông hâi kố dế trâm  rôh vâ mơeăm troh a tíu hngế kân drêng kong pơlê Quảng Ngãi ƀă Kon Tum ‘mot tơkŭm.

Pơla hdrối kố nah, kăn pơkuâ 2 to kong pơlê Quảng Ngãi ƀă Kon Kon hiăng xo Mang Deang vâ tơkŭm po rôh pêi cheăng apoăng tơpui ‘na tơdroăng ki ‘mot tơkŭm kong pơlê. Tung hên tơdroăng ki kal châ tơpui mê tơdroăng ki ‘mêng rơnêu troăng kân 24 ƀă mơdêk rĕng tơdroăng ki ‘no liăn pro troăng kân xŏn tơdrăng châ 2 to kong pơlê môi tuăn khât. Pôa Bùi Viết Hà, Kăn hnê ngăn Khu ôm hyô Mang Deang, ăm ‘nâi, kố cho tơdroăng ki tơ’lêi hlâu khât vâ tơdroăng ôm hyô kong – têa kơxĭ mơdêk ivá tơ’mot mâu ngế ôm hyô troh:

“Chin phuh ăm ‘mot tơkŭm kong pơlê Quảng Ngãi – Kon Tum, ngin cho mâu ngế ki pro ôm hyô a Mang Deang phiu ro khât. Mang Deang cho tơnêi tơníu ối a tíu xiâm. Mang Deang cho tíu xiâm ôm hyô dêi kong pơlê nếo mê ngin loi tiah kố kô mơnhông. Mâu ngế ki pro ôm hyô athế hbrâ rơnáu ăm tơná môi hiâm mơno đi đo hbrâ kơchăng ‘no liăn cheăng sap ing ivá cheăng troh liăn ngân vâ pơhlêh ngiâ néa dêi tơná. Khu ngăn ôm hyô ngin xuân dế tơmiât troh túa pơkâ, troăng tơmiât nhên vâ pêi teăm troăng pơkâ dêi kơpong tơnêi kố”.

Sap ing kơpong tơnêi ki ôh ti ai klâi xua tơplâ, Mang Deang – Kon Plông hâi kố hiăng xâp ăm dêi tơná môi ngiâ méa nếo tơniăn, hmâ achê ƀă ai hên tơdroăng rêh ối nếo. Mâu troăng prôk a kơpong tơnêi 7 to long 3 to xí nôkố hiăng hên kơdrâm hơniâp ro, hlo to chêng tơmối. sap ing troăng pơkâ ‘mot tơkŭm 2 to kong pơlê Quảng Ngãi – Kon Tum, Mang Deang – Kon Plông dế ai rôh vâ mơeăm lo a têa kơxĭ kân tối rơdêi dêi tơná a lơgât ôm hyô kơpong ƀă lâp plâi tơnêi.