Kơchơ OCOP kơpong Đông Bắc hên mơngế troh ƀă lối 250 khu tơbleăng tê tơmeăm, tơbleăng tê mâu tơmeăm OCOP ƀă tơmeăm pêi lo ing chiâk deăng, ká xi xŏng dêi kong pơlê Quảng Ninh ƀă hên kong pơlê, pơlê kong kơdrâm tung lâp tơnêi têa. Tơngôu prôk ngăn mâu tíu tê tơmeăm, nâ Mau Chi, ăm ‘nâi:

“Rêm hdrôh po kơchơ á hlo ki tơƀrê, túa pro thăm rế rơkê, mâu tơmeăm tơbleăng tê rế hên, hên mâu tơmeăm ki krúa lĕm tơniăn tâ”.

Rơtế tơdjuôm môi troăng hơlâ ƀă nâ Mai Chi, ngoh Lê Thế Trung, ăm ‘nâi: nôkố mâu siêu thĭ đi đo ai tơdroăng pêi pro, tơbleăng tê tơmeăm, drá ki vâ tê tơmeăm OCOP, sap ing tíu tê kơchâi, pôm, plâi ki krúa, tơmeăm kế kâ troh tơmeăm ki kal xuân ai xiâm rêi, xiâm ki pêi pêt châ quét mã QR..., mê mơngế rôe xúa kô hmiân tuăn rah rôe:

“Hdrối nah, ing kế kâ ki hmâ tê troh mâu kế kâ ki pro ƀă kơmăi, hngêi a hmâ rôe mâu tơmeăm ki rôe ing kong ê. Nôkố, tung kơchơ mơdró ai tê mâu tơmeăm châ mơnhên OCOP - tơmeăm ki pêi lo tung tơnêi têa xua yă tê ôh tá kơnâ, hlối lĕm krúa thăm châ ’mâi hơ’lêh ƀă ‘nâi xiâm ki mơjiâng pro mê a rah rôe. Malối cho mâu tơmeăm ki hmâ rôe ki pin mơni hmiân tuăn vâ pơxúa tung tơdroăng rêh ối dêi rơpŏng hngêi”.

Sap ing mơhnhôk mơngế Việt Nam xúa tơmeăm dêi Việt Nam, troh nôkố, tơmeăm pêi lo châ mơnhên OCOP hiăng mơhnhôk mơngế ki rôe ƀă tơdroăng mơ-eăm ‘mâi hơ’lêh pêi krúa lĕm, ai túa. Tơmeăm OCOP hiăng hlo tê a tâi tâng mâu siêu thĭ kơchơ kân kuăn ƀă hên mâu tíu tê tơmeăm ki vâ rĕng xúa. Po rơdâ tơmeăm ki lĕm OCOP ôh tá xê to mơdêk tơƀrê, túa ngăn ăm lĕm mơnâ mâ, chêh tíu mơjiâng pro mê ối gum ăm rêm ngế kuăn pơlê, rơpŏng khu mơdró hlê tơ’nôm, ai hnoăng  chiâng pêi ƀă rêm túa tơmeăm tê ăm kơchơ mơdró. Ing mê, pơ’lêh tuăn tơmiât pêi chiâk chiâng tuăn tơmiât pê lo tơmeăm vâ tê, tơrŭm krá ƀă lâp plâi tơnêi.

Khu pêi cheăng tơrŭm Mang Deang Forest, tơring Kon Plông, kong pơlê Kon Tum cho môi tơdroăng ki vâ pơtih ăm hlo ‘na ki mơdêk pê lo tơmeăm OCOP, mơjiâng inâi tơmeăm dêi kong pơlê. Rêm hơnăm, khu pêi cheăng tơrŭm pêi lo 100 tâ̆n kơphế arabica. 5 túa tơmeăm kơphế ki hiăng uâ pơliê ki ê châ mơnhên OCOP 3  troh 4 hơlŏng xuân dế châ tê hên a kơchơ tung tơnêi têa. Ngoh Lê Nhật Tiến, Phŏ pơkuâ Khu pêi cheăng tơrŭm, ăm nâi:

"Pơkâ OCOP tơtro a tíu kum Khu pêi cheăng tơrŭm ‘nâi troăng hơlâ pêi lo tơmeăm ing apoăng a troh kơchơ mơdró vâ pro ti lâi tơmeăm pêi lo lĕm tro má môi. Pakĭng 25 ha Khu pêi cheăng tơrŭm dế pêt nếo ƀă rak ngăn, mê ngin dế po rơdâ kơpong pêt loăng plâi, ki hdrối cho kĭ hợp đong  ƀă tơrêm rơpŏng ki tơhrâ rôe tơmeăm pêi lo dêi kuăn pơlê”.

Jâ Lê Thùy Kim Loan, Ngế pơkuâ Kŏng ti veăng tơlo liăn Pyloherb,  tíu pêi cheăng ki xúa 15 inâi OCOP dêi kong pơlê Kon Tum ‘na kơvâ pơkeăng, ăm ‘nâi:

"OCOP cho chưng chih dêi tơmeăm pê lo ki lĕm dêi tơrêm kơpong pêi lo. Pin thế pêi pro tro tiô chứng chih hnê pêi krúa lĕm châ mơnhên OCOP mê pin kô hlo tơmeăm pêi lo dêi tơná kô ai ki lĕm krê xêh. Krê to tem OCOP ki châ ăm a kong pơlê Lâm Đồng hiăng pro hdró tơmeăm ki lĕm tơviah krê”.

Tiô Tiĕn sih Nguyễn Ngọc Tuyên, Viện trương viện cheăng kâ ƀă rak ngăn Tây Nguyên, drêng hiăng ai hlá mơ-éa mơnhên OCOP tơkéa vâ tối cho hiăng mơjiâng inâi ƀă mơngế ki rôe xúa hiăng ‘nâi troh tơmeăm. Xua mê, mâu khu mơdró thế kơdôu mơ-eăm pôi tá pơtê ki pơ’lêh tuăn tơmiât pêi pro ƀă tê tơmeăm tung pơla rơxông cheăng ƀă kơmăi kơmok tiô rơxông nếo nôkố.

"Tơdroăng krâ hơlŏng ăm tơmeăm OCOP bú cho hlá mơ-éa vâ râng djâ ôh tá xê inâi, mê inâi thế cho tuăn loi dêi mơngế ki rôe. Drêng hiăng ai hlá mơ-éa thế hlối tơbleăng ki lĕm vâ tối inâi dêi tơná  drêng mê tơmeăm nếo pêi lo châ mơdêk. Pakĭng mê, xúa tro rôh tơ’lêi xiâm dêi kơmăi kơmok vâ pêi lĕm tro tung pơla nôkố”.

Ki tơƀrê pơxúa ing tơdroăng OCOP hiăng kum tơbâ tơmeăm khoăng, ai pơxúa tơmeăm pêi lo dêi kong pơlê, veăng ‘mâi mơnhông kơvâ pêi chiâk rơtế ƀă mơnhông pêi cheăng ƀă kŏng ƀă ôm hyô ngăn thôn pơlê. Tơdroăng loi khât dêi mơngê ki rôe xúa ƀă tơmeăm OCOP Việt Nam ăm hlo mâu tơmeăm pê lo dêi Việt Nam rế hlo châ tê hên a kơchơ tung tơnêi têa, veăng mơnhông cheăng kâ rế tơƀrê.