Tiô pơkâ dêi Tơnêi têa, la ngiâ kố ah, mâu kong pơlê Lâm Đồng, Bình Thuận ƀă Dak Nông kô ‘mot tơkŭm chiâng kong pơlê Lâm Đồng, tíu pêi cheăng kong pơlê ki nếo châ pro a pơlê kong kơdrâm Đà Lạt, kong pơlê Lâm Đồng. Tiô tối hdrối kô ai vâ chê 2.000 ngế kăn ƀô̆, kong chưk, viên chưk ƀă ngế pêi cheăng sap ing kong pơlê Dak Nông lăm troh a pơlê kong kơdrâm Đà Lạt pêi cheăng.

Klêi séa ngăn, dâng 20% tung kơxô̆ ki kố vâi púi tơngah pêi cheăng tiô kơpong tâng châ hbru ăm hnoăng pơkuâ ăm phêp. Tơdjâk troh tơdroăng ki xing xoăng khu tơrŭm kơ koan cheăng tơnêi têa a kong pơlê Lâm Đồng klêi kơ’nâi ‘mot tơkŭm, tiô tối hdrối kô tơdah xo vâ chê 7.750 ngế pêi cheăng tung kơ koan cheăng sap ing mâu kong pơlê hdrối vâ ‘mot tơkŭm. Dế nôkố, Hô̆i đong ‘mot tơkŭm kong pơlê nếo hiăng chêh pro túa pơkâ tŏng gum rơxế ki to prôk lăm, tíu ối ƀă hên ki ê vâ gum mâu kăn ƀô̆, kong chưk, viên chưk, ngế pêi cheăng hmiân tuăn tơniăn rêh ối, hbrâ rơnáu tơdah xo pêi dêi hnoăng cheăng a tíu pêi cheăng nếo.