Tơpui a Leh pơxiâm pro, pôa Phạm Minh Chính, Ngế pro xiâm hnê ngăn tơnêi têa tối, phiu ro drêng tơdroăng tơkêa bro ki kal kố, ai pơxúa tung tơdroăng cheăng la ngiâ ƀă mơnhông cheăng kâ rêh ối pơlê pơla dêi kong pơlê Hưng Yên ƀă tung lâp tơnêi têa.

Ngế pro xiâm hnê ngăn tơnêi têa púi tơngah Tơdroăng tơkêa kố kô chiâng môi tơdroăng ki xiâm, hdró tơrŭm cheăng tung la ngiâ tŭm têk, trâu hơngế, krá tơniăn pơla péa tơnêi têa Việt Nam – Mih. Ngế pro xiâm hnê ngăn tơnêi têa pơcháu ăm kong pơlê Hưng Yên rơtế ƀă khu ‘no liăn cheăng tung tơdroăng ki xo tơnêi. Rak ngăn tơdroăng rêh kâ ối ăm mâu rơpŏng, mâu ngế ki hiăng gum ăm tơnêi pêi pêi kâ kố ăm tơdroăng tơkêa bro, rak vế tơniăn tơdroăng rêh kâ ối liăn ngân, hiâm mơno kuăn pơlê tơniăn tro tâ tíu ối ki ton.

Tơdrêng amê hlối pơkâ thế mâu khu râ, kơvâ cheăng pơtối tŏng gum ‘na chêh pro hlá mơ-éa tung pơla tơbleăng pro tơdroăng tơkêa, pơkâ tơleăng troh tui lui mâu tơdroăng tơvâ tơvân tung pơla pêi pro tơdroăng tơkêa bro kố.