Pêi pro Tơdroăng mơjiâng thôn pơlê nếo, Đảng ƀô̆ cheăm Tà Nung mơnhên kố cho hnoăng cheăng kal kí ki kal, cho ivá mơdêk mơnhông cheăng kâ rêh ối pơlê pơla. Tung mê, hnoăng cheăng hnê hriâm tơdroăng kal kí hiâm mơno châ tơbleăng tơdâng tơ’mô, pro chiâng tơdroăng ki môi tuăn tung ki hlê plĕng ƀă pêi pro dêi kăn ƀô̆, đảng viên ƀă rêm rơxông kuăn pơlê pêi pro pơkâ thôn pơlê nếo.

Pakĭng mê, cheăm Tà Nung hiăng mơhnhôk tơlo hên kơxô̆ liăn vâ ‘no pêi cheăng pro hngêi trăng troăng klông. Troh nôkố, troăng prôk tung thôn pơlê hiăng lĕm tơdrăng, tâi tâng mâu troăng prôk tung thôn pơrá hiăng châ ok ƀê tong, pro ăm tơdroăng prôk lăm pơto chơ tơmeămchiâng tơ’lêi hlâu. Mâu hno têa châ ‘mêng pro, rak vế tŭm ai têa vâ tôh tơmeăm, gum mơdêk ki lĕm plâi kơtóu dêi hdrê loăng pêt. Tơdrêng amê, hngêi trung hriâm, hngêi pơkeăng cheăm, hngêi hôp tơdjuôm xuân châ ‘no liăn pro lĕm pêi pro châ tơdroăng púi vâ xúa, hriâm tâp ƀă khăm pơlât ivá châ chăn ăm kuăn pơlê.

Tung kơvâ cheăng kâ, cheăm mơhnhôk kuăn pơlê pơhlêh pêt mâu hdrê loăng, mơnăn păn tiô troăng pêt mơjiâng tơmeăm, xúa khoa hok, kih thuât tung pêt, păn. Hơnăm 2024, pêi châ liăn  rêm ngế dêi cheăm châ 60 rơtuh. Malối, túa pơkâ pêi chiâk deăng xúa kơmăi kơmok chal nếo tro ƀă ôm hyô pơlê pơla hiăng pro pơxúa tơƀrê ‘na liăn ngân, tăng cheăng pêi tơniăn ăm hên ngế pêi cheăm a cheăm.

La ƀă tơdroăng ki mơnhông cheăng kâ, cheăm xuân tơtrŏng rak vế ƀă mơnhông khôi túa lĕm tro hdroâng kuăn ngo. Hên tơdroăng tơkŭm pêi pro túa lĕm tro, hơdruê xoăng châ tơkŭm po đi đo, chiâng ai tíu ki xah hêi rơdêi ăm kuăn pơlê. Mâu tơdroăng “Tâi tâng kuăn pơlê tơrŭm mơjiâng tơdroăng rêh ối lĕm tro”, “Kuăn pơlê pêi chiâk, tê mơdró rơkê”, “5 ôh 3 krúa, 5 ôh 3 ai” châ tơbleăng trâu rơdâ, veăng gum mơjiâng túa rêh ối hloh hlê, rơkê plĕng.

Mâu troăng hơlâ tŏng gum rêh ối pơlê pơla châ pêi pro tơƀrê, rak vế tơniăn ăm rêm ngế kuăn pơlê pơrá châ khăm pơlât, hnê hriâm ƀă tŏng gum túa rêh ối cheăng kâ. Nôkố cheăm Tà Nung ôh ti ai xếo rơpŏng kơtiê. Kơxô̆ ngế kuăn pơlê veăng roê baoh hiâm khăm pơlât châ 97%. Tâi tâng vâi hdrêng tung hơnăm pơrá châ troh hngêi trung, tơdroăng ki hnê hriâm rơkê plĕng ôh tá la lâi pơtê châ mơdêk ƀă hên ki ê.

Tiô pôa Kră Jăn Ha Diệp, phŏ kăn pơkuâ ngăn Đảng ủi cheăm Tà Nung, mâu tơdroăng ki pêi pro tơƀrê kố cho tơdroăng ki mơhno  ăm ivá mơeăm ôh tá pơtê dêi khu pơkuâ tơdroăng kal kí ƀă kuăn pơlê. Vâ pơtối rak vế ƀă mơnhông mâu tơdroăng ki ƀlêi chiâng tung mơjiâng thôn pơlê nếo, cheăm mơdêk hnoăng cheăng, tơdroăng ki pôu râng dêi râ đảng, khu kăn pơkuâ, măt trâ̆n ƀă khu đoàn theh kal kí – pơlê pơla, malối cho hnoăng cheăng dêi kuăn pơlê. Mâu troăng pơkâ athế châ hnê tối trâu rơdâ, pro chiâng tơdroăng ki môi tuăn tung kuăn pơlê.

Rơtế ƀă mơdêk rơdêi tơdroăng ki mơnhông cheăng kâ pêi chiâk deăng tiô troăng krá ton, cheăm tơmâng ngăn tâ tơdroăng ki tơ’mot khu mơdró kâ ‘no liăn pêi cheăng. Tà Nung xuân thăm mơhnhôk mâu kơxô̆ liăn veăng tơlo vâ pêi pro klêi hngêi trăng, troăng klông, tơtrŏng rak vế kong prâi tơnêi tơníu, mơjiâng tơnêi tơníu tâ tá thôn pơlê bâ – ngiât – krúa – lĕm.

Ƀă tơdroăng ki tơdjuôm ivá dêi khu pơkuâ tơdroăng kal kí ƀă kuăn pơlê, cheăm Tà Nung dế rế hía rế pêi klêi Thôn pơlê nếo mơdêk ƀă thôn pơlê nếo tiô túa pơkâ. Ki xiâm má môi cho mơdêk ki rơkê pplĕng tung rêh ối ăm kuăn pơlê, rak vế mơnhông krá tơniăn.