Tối tơbleăng a rôh hôp, tung pơla hdrối kô hía nah, luât pơkâ tŏng gum, luât ‘na tơnêi chôa xúa tung rêh ối, mơnhông ki xêt rak ngăn tơnêi têa, veăng mơnhông cheăng kâ - rêh ối, tơniăn ‘na cheăng lêng, ƀă mơnhông krá dêi tơnêi têa; ‘mâi mơnhông tuăn loi dêi kuăn pơlê, khu mơdró ƀă khu ‘no liăn pêi cheăng.

Laga, ki khât ối mơhno ăm hlo tơdroăng ki pá, tơvâ tơvân môi tiah pơkâ hdró hâi tơdâng... A rôh hôp, pôa Phạm Minh Chính, Ngế pro xiâm hnê ngăn tơnêi têa  tối nhên: tơdroăng cheăng kal ƀă thế pêi tơdrêng vâ tah ki ối tơvâ tơvân, tơ’nôm Luât Tơnêi hơnăm 2024.

Ngế pro xiâm hnê ngăn tơnêi têa  pơkâ athế rơnêu tơ’nôm mâu tơdroăng pêi pro, tơdroăng pêi ‘na pơtối pê klêi luât pơkâ, luât rak ngăn, xúa tơnêi, tung mê tơ’nôm mâu troăng hơlâ ‘na pơkâ  xúa tơnêi.  Pêi ahdrối liăn ‘măn kơdĭng tơnêi mơjiâng tơmeăm khoăng, hngêi kơmăi, tơdroăng mơdró kâ, po rơdâ kơphô̆; pơtối rak ki tơtro tơnêi pêt báu klâng vâ tơniăn ‘na kế kâ dêi tơnêi têa.