Klêi kơ’nâi môi măng tĭng tơbleăng tơdroăng cheăng pêi pro tiô pơkâ kăn pơkuâ péa râ, khu pơkuâ a kong pơlê Gia Lai hiăng pêi cheăng tơniăn rơkê. Tơdroăng ki tiâ mơnhên mơdrếo mâu mơéa ki hiăng chêh pro klêi ing troăng hyôh internet châ tơbleăng pêi tơƀrê, bu ai iâ mâu tơdroăng tơvâ tơvân tung tơdroăng tơdjêp măng ƀă Tíu xiâm Tơnêi têa. Ki rơhêng vâ tối, hnoăng cheăng chêh pro tơleăng mơnhên mâu mơéa ăm kuăn pơlê pêi châ tơƀrê khât.

Pakĭng mâu tơdroăng ki hlo tơƀrê apoăng, kong pơlê xuân dế trâm ƀă mâu tơdroăng xơpá, pơloăng drêng ƀăng tơnêi lối 21 rơpâu met karê ối má péa lâp tơnêi têa, pơ’leăng mâ mơngế ối má môi chât. Gia Lai kal tơdroăng ki pơkuâ tơƀrê, rơkê tung pơkuâ ngăn tơnêi têa, tơdrêng amê hlối rak vế tơniăn gâk kring cheăng lêng. Pôa Hồ Quốc Dũng, kăn pơkuâ ngăn Đảng Gia Lai ăm ‘nâi: hlo tơdroăng ki ai khât kố, kong pơlê mơjiâng tíu pêi cheăng 2 a Pleiku, vâ klâ xoăng mâu kăn phŏ pơkuâ ngăn Đảng, môi ngế phŏ kăn hnê ngăn Vi ƀan kong pơlê pơkuâ, hnê mơhno vâ rak vế tơniăn kơ koan cheăng tơnêi têa châ pêi cheăng tơniăn tro, rơkê ƀă tơƀrê.