Khu mơhnhôk hriâm Việt Nam châ mơjiâng khế 10 hơnăm 1996. Troh nôkố, Khu kố ai vâ chê 27 rơtuh ngế, chiâng khu mơhnhôk hriâm lâp lu, kum tơdroăng mơhnhôk hdriâm kơhnâ, hriâm rơkê, mơjiâng pơlê pơla vâ hriâm  rế  mơnhông tơƀrê.

A rôh trâm mâ, teăng mâ Kăn Đảng, Tơnêi têa, pôa Lương Cường,  Kăn xiâm hnê ngăn tơnêi têa khĕn kơdeăn khât mâu hnoăng veăng ki hmái hơtĭng ki pêi tơbrê dêi mâu kăn ƀô̆ mơhnhôk hriâm. Kăn xiâm hnê ngăn tơnêi têa tối nhên, sap hâi mơjiâng tơnêi têa troh nôkố, Đảng, Tơnêi têa ƀă Pôa Hồ pâ nhoăm đi đo nhoăm mơdêk tuăn ngôa rơkê, hnê mơngế vâ pêi cheăng, ăm hriâm tơ’nôm vâ ai mơngế ki rơkê.

Ngăn hnê hriâm cho “luât pơkâ má môi”, cho troăng hơlâ mơnhông tơnêi têa. Tơdroăng mơjiâng Việt Nam chiâng môi tơnêi têa hriâm, tung mê rêm ngế kuăn pơlê xuân ai rôh châ hriâm ƀă châ mơhnhôk hriâm ôh tá xê to tơdroăng pơkâ ki lĕm tro, mê ối cho pơkâ ki kal vâ mơdêk ivá tơbriât cheăng dêi tơnêi têa, rế ai mơngế rơkê ƀă ‘mâi mơnhông kuăn ngo vâ mot tung rơxông nếo.