Hâi tiâ mơnhên tơdroăng cheăng pêi kố po ƀă tơdroăng ki tiâ mơnhên tơdrêng ƀă tiâ mơnhên ing troăng hyôh internet, gum hok tro châ ‘nâi túa tơmiât cheăng pêi dêi tơná, klâ xoăng tơdroăng hriâm tâp ăm tơtro ƀă ivá hriâm dêi tơná, tơdroăng rêh ối liăn ngân rơpŏng hngêi ƀă tơdroăng ki vâ châ pêi cheăng dêi pơlê pơla.

Pakĭng mê, hok tro ối châ hnê mơhno rah xo kơvâ cheăng hriâm ƀă chêh pro klêi hồ sơ séa ngăn rah xo mot hriâm. A rôh tiâ mơnhên, hên tíu hnê hriâm cheăng pêi ƀă khu mơdró kâ tung kong pơlê ƀă a kong pơlê ki ê hiăng tơbleăng tối ‘na kơvâ cheăng hnê, tơdroăng ki hnê ƀă tơdroăng ki châ xo mot pêi cheăng klêi kơ’nâi hiăng hriâm klêi.

Tơdroăng cheăng kố hiăng veăng gum kal khât ăm tơdroăng ki gum hok tro rah xo tro troăng prôk, kơdroh tơdroăng ki xơpá ‘na tơ’noăng hriâm đăi hok ƀă po rơdâ tơdroăng hnê cheăng krá tơniăn.