Ƀă lối 650 khu ki pleăng dêi hnoăng, tung khế 3 pơla hdrối kố nah, droh rơtăm tung lâp kong pơlê Lâm Đồng hiăng mơhnhôk tơlo ivá hơnăm ối nếo tơbleăng pro 500 tơmeăm khoăng xua droh rơtăm pro, tâi tâng kơnâ lối 4,1 rơtal liăn. Tung mê, pêi pro tiô tơdroăng tơ’noăng tơdjuôm ivá têa tah hngêi ối pơtân, tơ’nhiê xi kơchoh, ƀă tơdroăng ki mơhnhôk pro nếo 12 toăng hngêi, gum 160 hâi pro, tâi tâng kơnâ ‘na tŏng gum lối 800 rơtuh liăn. Tơkŭm po vâ chê hrĭng ngế lo lăm pêi cheăng Hâi tĭng ngiât, hâi ki kal pêi mơjiâng thôn pơlê nếo tơ’mot vâ chê 13.500 ngế đoân viên droh rơtăm veăng pêi.

Pakĭng mê, mâu khu râ pơkuâ Đoân kong pơlê Lâm Đồng hiăng tơkŭm po 137 khu droh rơtăm ki pleăng dêi hnoăng “Hnê ăm kuăn pơlê ‘na tơdroăng ki xúa pơhlêh kơxô̆”, gum vâ chê 10.000 ngế kuăn pơlê châ hriâm tơmâng ‘na tơdroăng ki xúa pơhlêh kơxô̆.

Nâ Trần Anh Tú, Kăn pơkuâ ngăn Đoân pơlê kong kơdrâm Đà Lạt tối tiah kố, mâu tơdroăng pêi pro châ tơƀrê kố hiăng mơhno nhên hnoăng cheăng djâ troăng ahdrối dêi mâu hơnăm ối nếo tung tơdroăng ki veăng mơnhông cheăng kâ rêh ối pơlê pơla kong pơlê.

“Ing mâu tơdroăng pêi pro kố mê ngin phiu ro khât xua tơdroăng ki veăng pêi pro kơhnâ dêi mâu vâi pú đoân viên. Tơdroăng mê tối rơdêi tiah kố hơnăm ối nếo vâi loi nhuô̆m khât mâu tơdroăng klâi ki hiăng tơkâ luâ ƀă hâk tơngăm ‘na khôi hmâ dêi mâu rơxông ki prôk hdrối nah. Ƀă ing mâu tơdroăng cheăng pêi pro môi tiah mê mâu vâi pú hơnăm ối nếo xuân đi đo chôu vế, mơ-eăm ƀă mơ-eăm hên tâ nếo tung tơdroăng cheăng pêi, mơhriâm, pêi cheăng vâ pơtối pleăng dêi hnoăng mơjiâng pơlê cheăm, tơnêi têa”.

Tiô ngoh Trương Văn Tùng, kăn ƀô̆ pơkuâ ngăn Đoân kong pơlê Lâm Đồng, ƀă tơdroăng ki pêi tơmiât rơkê, tơdroăng ki ai pơxúa, mâu tơdroăng cheăng hiăng pro tơdjâk rơdêi tung droh rơtăm ƀă pơlê pơla. Ing mê, mơnhông tơƀrê hiâm mơno djâ troăng ahdrối, tơdroăng pôu râng dêi hnoăng dêi mâu hơnăm ối nếo, pro chiâng tơdroăng ki tơ’noăng hơniâp ro ƀă ivá tơ’mot rơdêi tung đoân viên, droh rơtăm mâu phô̆m vâ xông kân tung lâp kong pơlê.

“Tung hơnăm 2025, ngin tơmiât kô tơkŭm po iâ hlái 4 xôh lo lăm pêi cheăng mơjiâng thôn pơlê nếo ƀă Hâi tĭng ngiât vâ pro tiah lâi, mê cho tơdroăng pêi rêm khế, ai pơxúa. Kố pơrá cho mâu tơdroăng pêi pro hiăng pêi sap ing ton nah ƀă ngin đi đo pơtối rak vế mơnhông”.