Kơmăng lơ 18/5, a Plông kân Ba Đình (Hà Nội), tơkŭm po tơdroăng ngê̆ thuât ki má môi dó inâi ‘’Pôa cho Hồ Chí Minh’’, ƀă tơdroăng ki veăng dêi mâu khu râ kăn pơkuâ hnê ngăn Đảng, Tơnêi têa. Ai pái tơdroăng dó inâi: ‘’Nguyễn Sinh Cung - Nguyễn Tất Thành’’ chêh tối tơdroăng ki chiâng tơdroăng rêh ối; ‘’Nguyễn Ái  Quốc - Hồ Chí Minh’’ mơhno tơdroăng ki ti tăng troăng tŏng gum tơnêi têa, mơjiâng Đảng; mơ’nui tơdroăng pơ-ôu pơ-eăng mâu tơdroăng châ tơƀrê kăch măng ƀă hneăng pơhlêh nếo, mot tơrŭm.

Mâu tơdroăng châ pro inhên ton, hlối tơdjêp ngê̆ thuât tiô khôi vâi krâ nah ƀă kŏng ngê̆ mơđah 3D tiô rơxông nếo, djâ troh mâu tíu ki má môi. Ing ngê̆ thuât ƀă mâu tơdroăng rơrêk, tơdroăng pơ-ôu pơ-eăng um méa kăn pơkuâ rơkê, ngế khên tơnôu tơleăng lĕm hdroâng mơngế, ngế ki rơkê má môi; tơdrêng amê hnê hriâm troăng tơmiât kăch măng, hiâm mơno, troăng tơdjâ Hồ Chí Minh troh mâu râ kuăn pơlê, ki rơhêng vâ tối cho rơxông ối nếo.