Pôa Trần Thanh Mẫn, Kăn xiâm hnê ngăn Kuô̆k hô̆i ăm ‘nâi, Rôh má 1, Hneăng hôp má 9 hiăng châ po ƀă tơdroăng pêi cheăng kơtăng khât, pôu râng dêi hnoăng, rĕng ƀă khŏm mơeăm ‘na tơdroăng cheăng kal kí, pro chiâng ai tơdroăng ki môi tuăn dêi mâu kăn Kuô̆k hô̆i. Tung mê, tơdroăng ki ai pơxúa ‘na kal kí – luât a hneăng hôp kố cho ing tơdroăng Pơkâ séa ngăn ‘mâi pơhlêh, ‘mot tơ’nôm mâu tơdroăng dêi luât hơnăm 2013 vâ pơtối pêi pro troăng hơlâ klâ xoăng, pro lế lê̆m kơ koan cheăng dêi khu xiâm pơkuâ tơdroăng kal kí. Pêi pro troăng hơlâ kố, măng tĭng hdrối, Khu pơkuâ Vi ƀan Xiâm Măt trâ̆n Tơnêi têa Việt Nam hiăng tơkŭm po Rôh hôp xo rơkong tơpui tối kơxop hlá mơéa Pơkâ ‘mâi pơhlêh, ‘mot tơ’nôm mâu tơdroăng dêi luât hơnăm 2013. Pơkuâ po rôh hôp, pôa Hoàng Công Thủy, phŏ kăn hnê ngăn Vi ƀan xiâm Măt trâ̆n Tơnêi têa Việt Nam tối nhên:

 “Tơdroăng ki ‘mâi pơhlêh, ‘mot tơ’nôm Luât rôh kố cho ai hâi khế pơkâ, tơkŭm a 8/120 troăng dêi Luât hơnăm 2013 vâ pro pơhlêh teăm tơdrêng troăng pơkâ dêi Đảng ‘na ‘mot tơkŭm kơ koan cheăng Măt trâ̆n Tơnêi têa Việt Nam, mâu khu tơrŭm cheăng kal kí pơlê pơla, mâu kuăn pơlê xua Đảng ƀă Tơnêi têa pơcháu hnoăng; pêi pro klêi túa tơkŭm khu kăn pơkuâ kong pơlê 2 râ tiô troăng achê kuăn pơlê, hmâ ƀă kuăn pơlê, gum kuăn pơlê tro tâ”.

Pôa Trần Thanh Mẫn, Kăn xiâm hnê ngăn Kuô̆k hô̆i ăm ‘nâi: Kơxop mơéa Pơkâ dêi Kuô̆k hô̆i ‘na mâu troăng tŏng gum, troăng hơlâ pơkâ ki tơviah mơnhông cheăng kâ krê mê cgo 7 Chương ƀae 17 Troăng, tung mê Pơkâ tơdjuôm tơdjâk troh pơhlêh tơdroăng tê mơdró; Gum ăm xúa tơnêi tơníu mơjiâng pro tê mơdró; Gum liăn, ăm mung liăn ƀă roê tơmeăm khoăng; Gum khoa hok kong ngê̆, pơhlêh nếo tơmiât pêi rơkê, pơhlêh kơxô̆ ƀă hnê mâu ngế cheăng; Gum khu mơdró kâ krâ kơvâ ƀă kân, khu mơdró kâ ki djâ ahdrối.

“Tơtrŏng má môi cho Pơkâ ‘na cheăng kâ krê. Xua, pơkâ dêi Đảng nếo kĭ hâi lơ 4/5 mê Chin phuh, Ngế pro xiâm hnê ngăn hiăng hôp péa rôh hôp hbrâ ăm pơkâ vâ pơtroh ăm Kuô̆k hô̆i. Đảng hiăng mơhno ăm troăng mê pin pro tiah lâi athế pêi pro, pơhlêh tơdroăng kố. Á pơcháu ăm Vi ƀan cheăng kâ, khu rak liăn ngân athế tơrŭm ƀă Khu xiâm ngăn liăn ngân xuân môi tiah mâu kơ koan ki tơdjâk hbrâ rơnáu ing hdrối, ing hngế “.

Pôa Trần Thanh Mẫn, Kăn xiâm hnê ngăn Kuô̆k hô̆i pơchân, Pơkâ ‘na mâu troăng hơlâ tŏng gum malối cho mơnhông cheăng kâ krê vâ pơhlêh tơdroăng ki ‘no liăn pêi cheăng tê mơdró; gum ăm châ xúa tơnêi tơníu, mơjiâng pro, tê mơdró; gum liăn, gum ăm mung liăn, roê kế tơmeăm tơnêi têa; mơdêk tơrŭm cheăng tơnêi têa krê ƀă kok roê tơmeăm ing khu mơdró kâ; gum khoa hok, kong ngê̆, pơhlêh nếo tơmiât pêi rơkê, pơhlêh kơxô̆ ƀă hnê mâu ngế cheăng; gum mơjiâng khu mơdró kâ krâ kơvâ ƀă kân, khu mơdró kâ ki djâ troăng ahdrối ƀă hên ki ê. Pôa Trần Thanh Mẫn, Kăn xiâm hnê ngăn Kuô̆k hô̆i tối nhên:

“Pin athế pơhlêh túa tơmiât, Tơnêi têa pro tơ’lêi hlâu pơhlêh xua séa ngăn, tiô hiâm mơno pôa Tô Lâm, kăn xiâm pơkuâ hnê ngăn cheăng Đảng hiăng tối prôk tối vêh hên xôh. Tơdroăng rak tơniăn ‘na luât ƀă tŏng gum pơhlêh kơxô̆. Pơhlêh nếo tơmiât pêi rơkê, cho túa ki Tơnêi têa rơtế prôk mâu ngế krê tung mơjiâng. Á pơkâ thế séa ngăn nhên mâu ngế, mâu tơdroăng ki châ pơxúa tŏng gum, rak tơniăn ki tơƀrê dêi troăng hơlâ tŏng gum tung tơdroăng ki ai khât”.

Vâ hbrâ tơdroăng ki kal ăm Rôh má 2 Hneăng hôp má 9, măng tĭng hdrối, Vi ƀan pơkuâ Kuô̆k hô̆i hiăng ăm veăng tơpui ‘na 3 tơdroăng ki kal tiô tối hdrối vâ pơtroh ăm Kuô̆k hô̆i a hâi lơ 19/5, tung mê cho: troăng pơkâ ‘no liăn cheăng tơdroăng tơkêa ‘no liăn pro troăng kân Quy Nhơn – Pleiku; Tơdroăng pơkâ ‘no liăn pro troăng ví 4 Pơlê kong kân Hồ Chí Minh.