Hâi mơ’nui măng tĭng, nâ Rơ Mah H’Dịu, Kăn pơkuâ hnê ngăn Đoân Droh rơtăm cheăm Ia Kriêng, tơring Đức Cơ, kong pơlê Gia Lai tơkŭm mâu vâi droh rơtăm, vâi o phô̆m vâ xông kân dêi cheăm Ia Kriêng, tơring Đức Cơ, kong pơlê Gia Lai tơkŭm vâi droh rơtăm, vâi o phô̆m vâ xông kân a hngêi hôp tơchuâm dêi pơlê vâ tơngah vâi krâ, mơngế ki rơkê hnê ‘na kih thuât tĕn tơmeăm ƀă hnê tôu chêng koăng. Rêm khu vâi rơxông nếo ối tâ tá vâi krâ, rak ngăn tơrêm tơdroăng ki pâ klêa tơlêa, klêa rái ƀă hên hĕng mâu tơdroăng ki ê. Khu ki ê vâi hâk mơnâ khât tung tơdroăng hriâm tơdrá, idrâp chêng koăng. Nâ Rơ Mah H’Dịu, Kăn pơkuâ hnê ngăn Đoân Droh rơtăm cheăm tối ăm ngin ‘nâi ‘na mâu tơdroănug cheăng ối tung Tơdroăng tơkêa pêi “Pơlê tĕn tơmeăm tiô khôi vâi krâ nah dêi droh rơtăm”.

“Ing tơdroăng tơkêa pêi kố, cho ing hiâm tuăn tơná ngin, á hlo vâi rơtăm, vâi rơxông nếo a pơlê ngin ôh tá ‘nâi tĕn pong, tĕn kơtup, tĕn chêa ki rơneăm tơmeăm khoăng, bu to to lâi ngế vâi krâ ki hiăng hên hơnăm tê. Xua tiah mê, á veăng tung tơdroăng tơkêa pêi kố tiô kơ tơdroăng pói rơhêng vâ khu rơxông nếo, vâi droh rơtăm hlo ƀă vêh mơhriâm nếo cheăng tiô khôi hmâ dêi pâ pôa roh nah hiăng hnê ‘măn ăm pin”.

Tơdroăng tơkêa pêi “Pơlê tĕn tơmeăm tiô khôi hmâ vâi rơtăm” hiăng châ kâ pri ối má môi ‘na Tuăn i hiâm hloh ‘nâi tăng mơjiâng tơdroăng cheăng roh má 6 hơnăm 2022 kong pơlê Gia Lai ƀă mot tung top 40 khu Mơgêi tơdroăng tơkêa pêi tí tăng mơjiâng tơdroăng cheăng pêi droh rơtăm thôn pơlê hơnăm 2023 xua Khu xiâm hnê ngăn Đoân Droh rơtăm tơnêi têa tơkŭm po. Tơdroăng tơkêa pêi kố hiăng tơ’mot kơdrâm kơdrĕng vâi rơtăm hdroâng kuăn ngo veăng pêi ƀă lối 700 ngế vâi o hok tro tung pơlê cheăm kố veăng pêi pro. Tơdrêng ƀă Tơdroăng tơkêa pêi kố, nâ Rơmah H’Dịu-Kăn pơkuâ hnê ngăn Đoân Droh rơtăm cheăm Ia Kriêng ối pơkâ pêi pro túa cheăng pơlê vâi rơtăm “2 ôh, 2 ai” a kơpong tíu tơkăng kong kố.

“Hriâm tâp tiô hiâm mơno, túa rêh ối, pêi cheăng Pôa Hồ Chí Minh ‘na rak vế khôi túa, vêa vong dêi hdroâng kuăn ngo, a pơlê Hrang. Đoân ngin hiăng mơjiâng Kâu lăk ƀô̆ mơjiâng bro không tiô kơ tơdroăng ki vâ mơnhông hiâm tuăn mơjo pâ pơlê xiâm, rak vế khôi túa, vêa vong ki lĕm tro dêi hdroâng Jarai ăm khu rơxông nếo. Ngin hiăng tơkŭm tơdroăng ki xah ôm hêi, rêi prôa, hơdruê xuăng, po hâi trâm mâ pơla mâu vâi đoân viên droh rơtăm pơla mâu pơlê. Ngin hiăng krếo thế mâu krâ pơlê, vâi ki rơkê trâm mâ, tơpui tơno, hơdruê, rơngê rơngối, hơ’muăn, xôi kiâ chal vâi krâ nah, ƀă rêi prôa, têng nêng ăm khu rơxông nếo i hmâng vâ hriâm trối”.

Tâng a kơpong tíu tơkăng kong, nâ Rơmah H’Dịu, Kăn pơkuâ hnê ngăn Đoân Droh rơtăm hâk git kơ todroăng pơtối rak vế, pơtối mơnhông khôi túa lĕm tro dêi vâi krâ nah dêi hdroâng Jarai, hâk tơngăm cho môi tung 100 ngế kăn ƀô̆ Đoân tung lâp tơnêi têa châ kâ pri Lý Tự Trọng hơnăm 2025, mê a cheăm Ia Ka, tơring Chư Păh, kong pơlê Gia Lai, thái Siu Sắt vêh pơtối mơdêk tơdroăng ki rơkê vâ gum vâi krâ pêi pêt kơphế krá tơniăn ton.

Túa ki hbrâ mơdât tơdroăng ki khăng khoăng ăm loăng kơphế a rơnó tôu mơdrăng ƀă túa pê pêt tiô túa hưh cơ hiăng châ hên kuăn pơlê a Tây Nguyên rơhêng vâ ‘nâi plĕng ƀă pêi pro ƀối. Ing tơdroăng ki rơkê kố hiăng kơnôm châ thái Siu Sắt (hdroâng Jarai) ối a pơlê Mrông Yô̆ 1, cheăm Ia Ka, tơring Chư Păh, kong pơlê Gia Lai ai tâ ‘măn tung facebook, tơ’mot châ lối rơpâu ngế châ ngăn.

“Hdrối nah, á hriâm kơvâ sư phăm điă lĭ a hngêi trung đăi hok sư phăm Quy Nhơn. Hơnăm 2015 á mơjiâng on veăng, hngêi kơdrâi á ối a Ia Ly, á hlo tơnêi tíu, hyôh kong prâi amê ga tơtro vâ mơnhông pêt loăng  kơphế. La vâi krâ-nhŏng o hdroâng Jarai akố pêi pêt kơphế tá hâi teăm krá tơniăn. Á tơmiât á cho ngế đoân viên athế hriăn plĕng, pro ti lâi gum vâi krâ ai troăng prôk ki nếo, mơnhông krá tơniăn tâ”.

Klêi kơ’nâi 10 hơnăm, thái Siu Sắt rơtế ƀă dêi kơdrâi cho Rơ Châm Awưnh hiăng mơjiâng kơpong ki pêt kơphế hưh cơ ƀă mơnhông Kŏng ti pêi cheăng tiô rơnó Uâ mơdiê kế tơmeăm ing chiâk deăng Jarai Ia Ly. Túa ki pêi pêt, rak ngăn, krí xo, chôu ‘măn kơphế dêi kŏng ti kố châ tro tiô tơdroăng pơkâ Organic ƀă VietGAP, ing mê, mơjiâng châ 3 khu, cho Kơphế Robusta tơpoăng ki to kơphế, Robusta kloăng kơphế ƀă Robusta ki dó inâi “Jrai Ialy Coffee”, châ mơnhên tối cho OCOP 3 hơlŏng. Kŏng ti kố hiăng tơrŭm ƀă 50 rơpŏng kuăn pơlê vâ mơnhông kơpong ki pêt to kơphế hưh cơ tâi tâng tơnêi tíu mê kân rơdâ châ 40ha. Ing mê, gum vâi krâ-nhŏng o hdroâng Jarai pơhlêh tuăn tơmiât tung mơdâ pêt kơphế, prôk troh a túa cheăng ki pêi mơjiâng, rak ngăn hưh cơ krá tơniăn. Tối ‘na tơdroăng pêi pro kố, thái Siu Sắt ôh tá hiât rơkong hnê tối dêi Pôa Hồ:

“Chúa vế rơkong Pôa Hồ hnê, pâ pôa pin hiăng ai hnoăng mơjiâng tơnêi têa, tơplâ khu xâ ki blong mot tung tơnêi têa pin, mê hdroâng hdrê, kuăn cháu pin mơjiâng tơnêi têa ƀă mâu hnoăng pêi cheăng, djâ dêi tơdroăng ki hiăng hlê, hiăng châ mơhriâm vâ xúa tung tơdroăng rêh kâ ối rêm hâi. Pin kơdo mơ-eăm tơkŭm kuăn pơlê tung pơlê cheăm, rơtế dêi pó pêi cheăng kâ, athế tơrŭm, tŏng gum dêi pó môi tiah rơkong Pôa Hồ hiăng hnê pơchân “Tơrŭm, tơrŭm, Tơrŭm kân-Ƀlêi chiâng, ƀlêi chiâng, ƀlêi chiâng kân”.

Mâu hơnăm hdrối mê hía nah, tơdroăng hriâm tâp ƀă pêi pro tiô tuăn i hiâm, túa rêh ối, túa cheăng Pôa Hồ Chí Minh hiăng châ rêm râ Đoân dêi kong pơlê Gia Lai tơkŭm pêi pro kơnôm ing mâu tơdroăng cheăng, hnoăng pêi pro dêi kăch măng. Lâp kong pơlê hiăng pơkâ pêi pro lối 10 rơpâu 500 tơmeăm khoăng, ‘na tơdroăng cheăng droh rơtăm tâi tâng kơnâ lối 150 rơtal liăn. Ngoh Đỗ Đức Thanh-Phŏ Kăn pơkuâ hnê ngăn Đoân Droh rơtăm kong pơlê Gia Lai tối ăm ‘nâi, ing hơnăm 2018 troh nôkố, a Kŏng thong tin điê̆n tưh dêi Khu hnê ngăn Đoân hiăng tối tơbleăng lối 400 ngế droh rơtăm ki rơkê kơhnâ, ki djâ troăng ahdrối tung rêm kơvâ cheăng.

“Mơhriâm tâp ƀă pêi pro tiô rơkong Pôa Hồ tối pơchân mê á hlo ai môi tơdroăng ki ai pơxúa păng ‘nâng mê cho châ ‘nâi, châ hlo ƀă po rơdâ tung tơdroăng hriâm ƀối mâu ngế ki rơkê kơhnâ, djâ troăng ahdrối. Ing mê, mơjiâng pro troăng prôk vâ đoân viên mơhriâm, hnê mơhnhôk dêi pó pêi pro i lĕm tơniăn tâ. Ngin kô pơhlêh nếo tiô túa ki hnê tối, tŏng gum troh tơdroăng ki mơjiâng troăng hơlâ vâ hnê tối ‘na tơdroăng cheăng kăch măng a facebook, zalo. Tung lâp khu Đoân, mê rêm ngế kăn ƀô̆ Đoân cho môi ngế ki djâ troăng ăm mâu đoân viên droh rơtăm vâ hriâm ƀối ƀă pêi pro tiô. Tơdroăng ki kơdeăn khĕn tơdroăng ki rơkê tung pêi pro tiô rơkong hnê tối dêi Pôa Hồ cho tơdroăng heăng ki ngin pơtối mơjiâng ivá cheăng ki nếo tung hneăng mơhnhôk mơhriâm ƀă pêi pro tiô tuăn i hiâm, túa rêh, túa cheăng Pôa Hồ Chí Minh”.