Sap ing apoăng khế 7/2025, Vi ƀan hnê ngăn cheăm Ia Băng, kong pơlê Gia Lai hiăng hbrâ rơnáu tơkŭm po mâu hneăng hôp kuăn pơlê, tối pơtâng ăm troăng tơdjâ mơ’no tơkêa bro, hmâng hiâm tuăn, tơdroăng pói rơhêng vâ dêi kuăn pơlê. Pơtối mê, hiăng mơjiâng khu ki pêi hnoăng cheăng chêl thiê̆n, tơdrêng amê, hnối tơrŭm krá khât ƀă Khu pơkuâ ngăn tơdroăng tơkêa bro mơ’no liăn mơjiâng tơmeăm khoăng dêi kong pơlê ƀă tíu ki hnê tối ‘na kih thuât vâ hbrâ tâp hdró loăng tơkăng tung khế 8 hơnăm 2025. Pôa Nguyễn Trường Sinh, Kăn hnê ngăn Vi ƀan cheăm tối ăm ngin ‘nâi, ƀă kơlo hnoăng cheăng ki nếo, cheăm hiăng châ veăng pêi pro tung hnoăng cheăng chêl thiê̆n, xo tơnêi tíu, gum ăm tơdroăng cheăng châ pêi pro rĕng tâ:

“Troăng tơdjâ dêi Vi ƀan hnê ngăn kong pơlê pêi pro tiah mê, tiô ngin cho tro ‘nâng. Ƀă mâu troăng km ki prôk tơkâ luâ, ngin kô hbrâ rơnáu tung hnoăng tơpui tơno ƀă kuăn pơlê, ga kô tơ’lêi tâ. Tung mê, Vi ƀan hnê ngăn kong pơlê xuân tŏng gum, pơkuâ hnê mâu khu pơkuâ tơdroăng tơkêa bro ƀă khu ki hnê tối kơhnâ khât tung tơrŭm ƀă cheăm vâ ngin pơkâ pêi pro ăm tơdroăng vâ xo tơnêi tíu, chêl thiê̆n, trâ văng nhâ êa châ rĕng mâ môi, tơtro má môi ƀă mơjiâng tơdroăng ki vâ môi tuăn tung kuăn pơlê hên má môi”.

A cheăm ‘Mang Yang, tíu ki ai 10 km 3 troăng kân-tơdrăng pơla Quy Nhơn ƀă  Pleiku ki vâ prôk tơkâ, ai lối 400 rơpŏng kuăn pơlê athế mơdrếo ăm tơnêi têa ‘na tơnêi tíu, tung mê ai dâng 22 rơpŏng athế lăm ối a pơlê nếo. Pôa Võ Lê Xuân Thiện-Kăn hnê ngăn Vi ƀan cheăm ‘Mang Yang tối ăm ngin ‘nâi, cheăm kô rĕng mơjiâng khu ki cheăng xo tơnêi ƀă khu ki pơkuâ ngăn tơdroăng tơkêa bro dêi cheăm, tơrŭm lăm ngăn, tí tăng riân mơnhên vâ chêh bro hlá mơ-éa chêl thiê̆n ăm mâu rơpŏng ki mê.

“Klêi kơ’nâi pro tơdroăng chêl thiê̆n, tí tăng xo tơnêi tíu, ƀă 22 rơpŏng kuăn pơlê kal athế lăm ối a tíu ki ê, ngin hiăng hbrâ tơnêi tíu vâ gum ăm mâu rơpŏng ki mê. Tíu tơnêi ki mê ga achê ƀă kơpong troăng kân-tơdrăng, xua mê, xuân tơ’lêi tung tơdroăng ăm kuăn pơlê lăm ối a tíu nếo”.

Tơdroăng tơkêa bro troăng kân-tơdrăng pơla Quy Nhơn ƀă Pleiku cho troăng kân ki kal xiâm dêi tơnêi têa, xŏn ai vâ chê 125 km kơtâu troh a kong pơlê Gia Lai. Tơdroăng tơkêa bro kố ai tâi tâng kơxô̆ liăn mơ’no lối 43.700 rơtal liăn, tiô tối hdrối kô pơxiâm pro a mơ’nui hơnăm 2025 ƀă kô pêi pro klêi a hơnăm 2029. Troăng ki tơkâ luâ 17 to cheăm, bêng dêi kong pơlê Gia Lai, ga ai tơdjâk troh lối 3.000 rơpŏng kuăn pơlê. Tung mê, ai lối hrĭng rơpŏng dêi kuăn pơlê kal athế pro pơlê nếo.

Pôa Nguyễn Tự Công Hoàng-Phŏ Kăn hnê ngăn Vi ƀan kong pơlê Gia Lai vêh mơnhên, tơdroăng ki chêl thiê̆n tơnêi tíu cho hnoăng cheăng ki pá khât, pơkal athế pơkâ pêi pro tro ƀă tơdroăng ki ai păng ‘nâng. Kong pơlê hiăng hbrâ kơxô̆ liăn vâ pêi pro, tơdrêng amê, hnối hnê, athế xúa hnoăng ki châ tŏng gum, athế lăm xo tíu ki chiâ xo kế tơmeăm tung kơdrâm tơnêi ƀă tơbăng ki hvât xok, veăng rĕng pêi pro, athế ‘nâi hiâm tuăn kuăn pơlê ƀă pêi pro tro ƀă tơdroăng ki ai păng ‘nâng dêi tơrêm pơlê cheăm. Ing mê, tơdroăng ki chêl, tŏng gum, ăm kuăn pơlê pro pơlê nếo xuân châ pêi pro tro tiô tơdroăng, athế pêi pro tro tiô hiâm mơno ki pói vâ ki păng ’nâng dêi kuăn pơlê.

“Khu kăn pơkuâ hnê ngăn athế lăm ngăn, vêh mơnhên: to lâi rơpŏng kal vâ pro pơlê nếo, lăm ối a tíu ki nếo, to lâi tơnâp kiâ kal athế ‘mâi xĕn tíu ê, tíu ki vâ ‘mé ulâi, hiâm tuăn kuăn pơlê pói vâ tiah lâi, tơtro a tíu ki lâi, mê kô ăm kuăn pơlê rêh ối a tíu ki mê, athế ngăn nhên tơdroăng ki ai păng ‘nâng dêi kuăn pơlê. Klêi kơ’nâi hiăng vâ môi tuăn mê athế tăng khu, ngế ki hnê tơdroăng cheăng vâ mơjiâng pơlê nếo klêi mê, chêh tối tung hlá ki tơbleăng hriăn plĕng hôm chiâng pêi pro lơ ôh, vâ ga tơniăn ăm tơdroăng mơjiâng pro troăng kân-tơdrăng pơla Quy Nhơn troh a Pleiku. Tâi tâng mâu pơlê cheăm ki nếo pro athế chêh tối i nhên vâ châ pâ kơxô̆ liăn ki vâ pêi pro. Á pâ thế hnoăng cheăng kố athế châ rĕng pêi pro, tơdrêng hlối”.

Tơdroăng ki hbrâ rơnáu nhên ăm tơdroăng tơkêa kố ăm hlo ki kơdo mơ-eăm kân khât dêi cheăng kal kí dêi kong pơlê Gia Lai tung pơkâ pêi pro tơdroăng tơkêa bro troăng kân ki kal xiâm, ing mê, mơjiâng chiâng tíu ki vâ tơdjêp, tơkoh, thăm mơnhông ‘na tơdroăng pêi cheăng kâ-rêh ối pơlê pơla tung pơla rĕng má môi a la ngiâ.