Hâi lơ 11/4, Vi ƀan kong pơlê Gia Lai hiăng ai mơ-éa xing xoăng mâu khu, kơvâ cheăng, kong pơlê hbrâ mâu tơdroăng xiâm ‘na tơdroăng xo tơvêh troăng hơlâ mơ’no liăn cheăng Tơdroăng tơkêa bro Plông Golf Đăk Đoa. Pơtối mê, hdrối hâi lơ 20/4, Khu pơkâ túa cheăng ƀă mơ’no liăn cheăng Gia Lai kêi đeăng hô sơ pơkâ tơdroăng tah lôi tơdroăng há yă a tơdroăng tơkêa bro Plông golf Đăk Đoa; Khu pơkuâ ngăn liăn ngân Gia Lai pro kêi đeăng hô sơ tah lôi tơdroăng há yă tơmeăm a tơnêi, hnoăng xúa tơnêi a tơdroăng tơkêa bro.

Xuân tung khế 4/2023, mâu Khu pơkâ túa cheăng ƀă mơ’no liăn cheăng, Liăn ngân, Mơjiâng, Loăng pơlái kong kế ƀă kong prâi ƀă Vi ƀan tơring Đăk Đoa tơrŭm séa ngăn, séa ngăn mâu tơdroăng pro mơ-éa mơ’no liăn cheăng, pơkâ troăng hơlâ mơ’no liăn cheăng, tê há yă tơmeăm a tơnêi ƀă tơdroăng pêi pro hnoăng cheăng pơkuâ ‘na liăn ngân a mâu tơdroăng tơkêa bro.

Pakĭng mê, Vi ƀan kong pơlê Gia Lai xuân pơkâ Khu pơkuâ túa cheăng ƀă mơ’no liăn cheăng kêi đeăng hô sơ pơkâ thế Vi ƀan kong pơlê Gia Lai, tơbleăng Khu pơkuâ cheăng Đảng, ƀă pêi cheăng ƀă mâu Khu xiâm ki tơdjâk ‘na tơdroăng tơbleăng Ngế pro xiâm hnê ngăn Chin phuh xo tơvêh troăng hơlâ mơ’no liăn cheăng ƀă tơdroăng tơkêa bro plông golf Đăk Đoa.