Ki nhên, kơxo lơ 1/3, a Khu pơkuâ ngăn Đảng tơring Čư̆ Pah, pôa Châu Ngọc Tuấn, Kăn phŏ pơkuâ hnê ngăn Đảng, ngế pơkuâ khu kăn Kuô̆k hô̆i kong pơlê Gia Lai pơkuâ po rôh hôp tơbleăng Pơkâ dêi Khu pơkuâ ngăn Đảng kong pơlê ‘na hnoăng cheăng kăn ƀô̆.

Rôh hôp hiăng tơbleăng Pơkâ thế pôa Trần Minh Sơn, Ngế cheăng tung khu pơkuâ ngăn Đảng kong pơlê, kăn pơkuâ hnê ngăn Đảng tơring, kăn hnê ngăn Hô̆i đong tơring Čư̆ Pah pro kăn pơkuâ ngăn Đảng đoân Vi ƀan Măt trâ̆n Tơnêi têa Việt Nam kong pơlê pơla hơnăm 2019 – 2024.

Pôa Sơn xo pêi dêi hnoăng cheăng a Vi ƀan Măt trâ̆n Tơnêi têa Việt Nam kong pơlê ing hâi lơ 1/3/2024. Kơxê rơtế tung hâi ki mê, Khu pơkuâ ngăn Vi ƀan Măt trâ̆n Tơnêi têa Việt Nam kong pơlê Gia Lai tơkŭm po Rôh hôp Vi ƀan Măt trâ̆n Tơnêi têa Việt Nam kong pơlê rôh má 12 (ôh tá tối hdrối) hneăng 10 pơla hơnăm 2019 – 2024 tiô pơkâ môi tuăn vâ pôa Hồ Văn Mười, Ngế cheăng tung pơkuâ ngăn Đảng, Kăn hnê ngăn Vi ƀan Măt trâ̆n Tơnêi têa Việt Nam kong pơlê pơtê pro kăn hnê ngăn Vi ƀan Măt trâ̆n Tơnêi têa Việt Nam kong pơlê Gia Lai hneăng 10 pơla hơnăm 2019 – 2024 tiô tơdroăng púi vâ dêi tơná.

Klêi mê, pơkâ thế pôa Trần Minh Sơn, Ngế cheăng tung pơkuâ ngăn Đảng, kăn pơkuâ ngăn Đảng đoân Vi ƀan Măt trâ̆n Tơnêi têa Việt Nam kong pơlê veăng tung Ngế cheăng dêi Vi ƀan Măt trâ̆n Tơnêi têa Việt Nam kong pơlê ƀă pro kăn hnê ngăn Vi ƀan Măt trâ̆n Tơnêi têa Việt Nam kong pơlê hneăng 10, pơla hơnăm 2019 – 2024.