Tôh pơkuâ, gâk ngăn kong dêi pơlê Keo, cheăm Ayun, tơring Chư Sê tơdah pơkuâ, gâk ngăn lối 100 hectar kong ing Khu pơkuâ kong tât khía Chư Sê. Laga ƀăng kong a kố ai hên nhâ răng hŏn, khăng tơ’lêi chếo kong. Ngoh Bùi Văn Khánh, tôh pơkuâ kong dêi pơlê Keo, cheăm Ayun tối ăm ‘nâi:

‘’Nhŏng o đi đo lăm ngăn kong ki má lối cho drêng kong tô khăng khoăng môi tiah kố. Tâng ai tơdroăng on chếo mê ngin tơbleăng ăm khu pơkuâ gâk ngăn kong ƀă kơ koan cheăng vâ hbrâ mơdât tơdrêng’’.

Mot rơnó kong tô khăng khoăng, Khu pơkuâ gâk ngăn kong tât khía Chư Sê hiăng rah tŭm tâi tâng 7 tôh pơkuâ, gâk ngăn kong; đi đo séa ngăn, pơkuâ a mâu tíu on chếo kong. Tơdrêng amê tơkŭm chôu hdrối ai gâk ngăn rơtâ tá ƀăng deăng lối 400 ha kong pêt ƀă kong ki ai xêh tơ’lêi chếo a tung 3 cheăm: Bar Maih, Ayun ƀă H’Bông.

Pôa Đinh Mạnh Phong, Kăn pơkuâ gâk ngăn kong tât khía Chư Sê, kong pơlê Gia Lai tối ăm ‘nâi, tơdroăng chôu nhâ pêi kô kum tung tơdroăng hbrâ mơdât on chếo kong châ mơdât.

‘’Troh rơnó tô khăng mê tơmeăm ki chếo cho hên, xua mê drêng chôu hdrối ‘nâi tơdroăng mê kô kơdroh tơmeăm ki chếo, ôh tá ai chếo kân; ing mê pin châ rak kong tơniăn tâ’’.

Khu pơkuâ gâk ngăn kong tât khía Chư A Thai ai ƀăng deăng kong ối tung péa tơring Ia Pa ƀă Phú Thiện, kong pơlê Gia Lai ƀă vâ chê 19 rơpâu hectar kong. Pôa Phạm Đắc Vịnh, Kăn phŏ pơkuâ gâk ngăn kong tât khía Chư A Thai tối ăm ‘nâi: Nôkố, kố cho kơpong ai tơbleăng tơ’lêi chếo kong râ V (râ ki rơ-iô má môi).

‘’Tíu cheăng hiăng pro 5 tôh khu tơdjêp ƀă 125 rơpŏng tơdah gâk ngăn kong dêi tíu cheăng pêi pro tơdroăng pơkuâ gâk ngăn kong ƀă hbrâ mơdât chếo on. Ƀă kong kơdrâng ki tíu cheăng dế pơkuâ mê ahdrối mot rơnó tô cho tíu cheăng hiăng pêi pro troăng chôu hdrối kâi mơdât vâ kơdroh tơmeăm chếo vâ ôh tá ai chếo kong’’.

Vâ hbrâ mơdât chếo kong châ tơƀrê, sap hơnăm 2023 troh nôkố, Vi ƀan tơring Ia Grai rơtế mâu tíu cheăng pơkuâ kong ƀă tơrŭm ƀă khu râ kăn pơkuâ tơring tơkŭm po 15 roh pơtâng Luât pơkuâ, gâk ngăn ƀă mơnhông pêt kong a 5 cheăm ai kong ƀă lối 1000 roh ngế veăng; Kĭ tơkêa tơniăn kong ôh tá châ chếo kong ƀă hrĭng rơpŏng rêh ối achê kong, xing xoăng lối 2 rơpâu mơ-éa chêh tơbleăng ăm kuăn pơlê mâu cheăm ai kong vâ tơdroăng hbrâ mơdât on chếo kong châ tơƀrê. Pôa Đỗ Văn Đông, Kăn phŏ hnê ngăn Vi ƀan tơring Ia Grai, kong pơlê Gia Lai tối ăm ‘nâi:

‘’Vi ƀan tơring hiăng tơkŭm po lăm séa ngăn nhên a mâu khu pơkuâ gâk ngăn kong ƀă mâu tíu cheăng pơkuâ kong vâ mơdêk hiâm mơno pôu râng hnoăng cheăng tung tơdroăng hbrâ mơdât chếo kong, ki rơhêng vâ tối cho tung tơdroăng hbrâ mơdât, ôh tá ăm ai chếo kong’’.