Nôkố, a 7 cheăm dêi 3 tơring tơkăng kong kong pơlê Gia Lai hiăng mơjiâng kơpong gâk kring xêh, hbrâ mơdât krá tơniăn a 49 thôn, pơlê, ƀă tâi tâng kơxô̆ kuăn pơlê rêh ối a tơkăng kong lối 11.700 rơpŏng. A kố, Khu râ kăn pơkuâ hnê ngăn cheăng Đảng, Vi ƀan kong pơlê Gia Lai hiăng hnê mơhno mâu khu cheăng, kơvâ cheăng, khu râ kăn pơkuâ kong pơlê rơtế tơrŭm ƀă khu mô đô̆i gâk tơkăng kong pêi pro tơdroăng pro nhŏng o, tŏng kum mâu thôn, pơlê pêi pro hên tơdroăng môi tiah ‘’Hngêi hơtô tơkăng kong’’ Hngêi hơtô ăm kuăn pơlê tíu tơkăng kong, rơlố; Ro hdrê ăm mơngế kơtiê; Rơtế vâi kơdrâi tơkăng kong, ƀă hía hé.

Kăn ƀô̆, mâu lêng mô đô̆i gâk tơkăng kong xo dêi liăn khế, ƀă tâi tâng kơxô̆ liăn hrĭng rơtuh liăn rêm hơnăm vâ pêi pro troăng pêi ‘’Kum o troh hngêi trung – Kuăn roăng đông mô đô̆i gâk tơkăng kong’’. Ing mê, roăng rak 52 ngế hok tro tơkăng kong, ai tơdroăng rêh ối pá puât châ hriâm ing lâm 1 troh lâm 12, hnê chư ăm hrĭng ngế muăn ối kŭn a kơpong hơngế, hơngo. Krâ pơlê Ksor H’Lâm, cheăm tơkăng kong Ia Mơr, tơring Chư Prông tối ăm ‘nâi:

“Ƀă kuăn pơlê tơkăng kong môi tiah cheăm ngin, mê mô đô̆i gâk tơkăng kong cho mơngế nhŏng o tung hngêi. Tŭm tơdroăng kŭn môi tiah mơjiâng pro hngêi, muih chiâk, pông klâng, mô đô̆i gâk tơkăng kong hbrâ tŏng kum; ai tơdroăng klâi hôu dêi pó xuân kơnôm mô đô̆i gâk tơkăng kong troh hngêi tơleăng, châi tamo nếo, xuân kơnôm troh mô đô̆i gâk tơkăng kong’’.

Rơtế amê, khu mô đô̆i gâk tơkăng kong rơtế khu râ kăn pơkuâ xuân tơrŭm pêi pro tơtro mâu tơdroăng kum kuăn pơlê mơnhông cheăng kâ, xăm kơklêa kơdroh kơtiê, pơhlêh troăng tơmiât, troăng pêi tung pêt mơjiâng tơmeăm. Tơdroăng kố kum mơnhông cheăng kâ – rêh ối pơlê pơla a kơpong tơkăng kong, mơjiâng tơdroăng môi tuăn dêi Kuăn pơlê ƀă khu râ kăn pơkuâ tung tơrŭm tơniăn gâk kring kơpong tơkăng kong.

Xông tơpui a hneăng hôp, pôa Trương Hải Long – Kăn phŏ pơkuâ hnê ngăn cheăng Đảng, Kăn hnê ngăn Vi ƀan kong pơlê Gia Lai mơnhên ƀă kheăn kơdeăn mâu tơdroăng châ tơƀrê tung tơdroăng mơjiâng tíu gâk kring xêh, hbrâ mơdât tơkăng kong tung pơla kố nah. Tơdrêng amê mơnhên, hnoăng pơkuâ tơkăng kong tơnêi têa cho krih tơviah ƀă ôh tá ăm châ mot, pơkâ thế khu mô đô̆i gâk tơkăng kong pơtối mơnhông hnoăng dêi tíu cheăng pơkuâ tung tơdroăng pơkuâ, gâk kring tơkăng kong; thăm tơrŭm cheăng ƀă kuăn pơlê; mơdêk pơtâng tối, hnê hriâm ‘na hnoăng pơkuâ, tơkăng kong tơnêi têa; tơtrŏng tung tơdroăng mơjiâng tíu cheăng ó rơdêi tâi tâng, mơjiâng mâu cheăm tơkăng kong krá tơniăn ó rơdêi tŭm tơdroăng, kum gâk kring tơniăn tung pơlê pơla.

‘Na peăng khu mô đô̆i gâk tơkăng, Thiê̆u tươ̆ng Nguyễn Đức Mạnh, Kăn phŏ pơkuâ Mô đô̆i gâk tơkăng kong Việt Nam mơnê Khu râ kăn pơkuâ hnê ngăn cheăng Đảng, Vi ƀan kong pơlê ƀă mâu tơring, khu cheăng, kơvâ cheăng dêi kong pơlê Gia Lai ƀă kuăn pơlê kơpong tơkăng kong hiăng tơrŭm, tŏng kum khu mô đô̆i gâk tơkăng kong kêi đeăng hnoăng cheăng.

Tiô Thiê̆u tươ̆ng Nguyễn Đức Mạnh, tơdroăng lâp plâi tơnêi ƀă kơpong ai hên tơdroăng ki ôh tá tơniăn, mơ’no pơkâ nếo, pơkâ thế mơdêk ivá tâi tâng kuăn pơlê, mơjiâng gâk kring tâi tâng kuăn pơlê krá tơniăn ƀă khu cheăng kal kí a cheăm, pơlê krúa lĕm, krá tơniăn rơdêi tâi tâng. Tung mê, khu mô đô̆i gâk tơkăng kong thế mơnhông hnoăng tơrŭm, tơbleăng ƀă kuăn pơlê ƀă khu râ kăn pơkuâ dêi kong pơlê vâ kêi đeăng pơkâ pêi tơdjuôm:

“Ƀă Mô đô̆i gâk tơkăng kong Gia Lai pơkâ thế pơtối pêi lĕm tro tơdroăng tơbleăng ăm Đảng ŭy Khu xiâm pơkuâ lêng ƀă Khu râ kăn pơkuâ hnê ngăn cheăng Đảng, Hô̆i đong kuăn pơlê, Vi ƀan kuăn pơlê tung kong pơlê tung tơdroăng pơkuâ hnê mơhno mâu râ mâu kơvâ cheăng mâu khu râ ƀă kuăn pơlê mơnhông ivá ó rơdêi tâi tâng tung veăng mơnhông cheăng kâ, rêh ối pơlê pơla xăm kơklêa kơdroh kơtiê Mơjiâng khu cheăng kal kí veăng kum kêi đeăng hnoăng cheăng mơjiâng pơkuâ gâk kring hnoăng pơkuâ tơnêi tơníu gâk kring tơkăng kong tơnêi têa’’.

Roh kố, Khu xiâm pơkuâ Mô đô̆i gâk tơkăng kong Việt Nam, Vi ƀan kong pơlê Gia Lai hiăng diâp ƀâng kheăn kơdeăn; Khu xiâm pơkuâ Mô đô̆i gâk tơkăng kong kong pơlê Gia Lai diâp Kih niê̆m chương ăm mâu khu pú hên, ngế krê ki kơhnâ rơkê ai veăng kum hên tung tơdroăng pêi cheăng.