Tung pái khế apoăng hơnăm 2023, tơtêk tâi tâng tơmeăm a Gia Lai châ 5,91%, xo hnoăng liăn ngân tơnêi têa châ 1.700 rơtal liăn.

Ki kơnâ mâu kơvâ pêt mơjiâng tơmeăm pêi lo ing chiâk deăng – loăng pơlái kong kế, kơmăi kơmok ƀă tê mơdró pơrá châ tơƀrê lĕm. Mơhé mê, tâi pái khế apoăng hơnăm, Gia Lai mơ’no liăn cheăng tơnêi têa nếo châ vâ chê 6% xua kreăng tăng tơnêi, hrá pêi pro mâu mơ-éa pêi pro tơdroăng tơkêa bro; tơdroăng pro xôi luât rak vế kong xuân tá hâi tơniăn. A hneăng hôp, pôa Trương Hải Long – Kăn phŏ pơkuâ hnê ngăn cheăng Đảng kong pơlê, Kăn hnê ngăn Viƀan kong pơlê Gia Lai pơkâ thế mâu khu, kơvâ cheăng ƀă kong pơlê tơkŭm tah lôi pá puât, pêi pro lĕm mâu tơdroăng pro tơniăn cheăng kâ, 3 tơdroăng pơkâ xiâm tơnêi têa ƀă mâu tơdroăng pêi pro, pơkâ tơdroăng cheăng dêi Tĭnh ŭy.