Mâu đông mô đô̆i gâk tơkăng kong ối tung Khu pơkuâ Mô đô̆i gâk tơkăng kong kong pơlê Gia Lai hiăng mơjiâng pơkâ pêi gâk kring tơkăng kong tơnêi têa roh hdrối, tung ƀă kơ’nâi Têt Lo hơnăm nếo. Mâu tíu cheăng pêi pro ‘nâi nhên tơdroăng tung tơnêi têa, kong têa ê, tơkăng kong; tơkŭm pơtâp, hnê mơhno mâu troăng pơkuâ, gâk kring tơkăng kong ƀă mâu pơkâ séa ngăn kí, séa ngăn pơla péa pâ ƀă khu gâk kring tơkăng kong peăng kong têa Kul.

Tơdrêng amê, mâu tíu cheăng thăm pơtâp mâu troăng pêi, pêi pro mâu tơdroăng hbrâ rơnáu tơplâ, ôh tá lôi ăm ai tơdroăng ki kơdrâ, tơngôu. Rơtế amê, khu mô đô̆i gâk tơkăng kong pơtối thăm ối tung tơkăng kong, tơrŭm ƀă khu cheăng, khu râ kăn pơkuâ kong pơlê pêi pro tơdroăng hbrâ, mơdât mâu ngế xôi a kơpong tơkăng kong; mơhnhôk tơdroăng tâi tâng kuăn pơlê xăm tối mâu ngế xôi, ki má lối cho xôi tê mơdró liu tung roh Têt.