Vâ rak tơniăn tung gak kring tơkăng kong a rôh Têt Lo hơnăm nếo Quý Mão 2023, Khu ngăn Mố đô̆i gâk tơkăng kong dêi kong pơlê Gia Lai thăm mơdêk tơplâ mơdât ƀă mâu ngế ki pro xôi luât a tíu tơkăng kong. Khu pơkuâ ngăn Mố đô̆i gâk tơkăng kong kong pơlê Gia Lai hiăng hnê mơhno 8 to đông gâk tơkăng kong mơhnhôk ivá, mơdêk mâu troăng hơlâ pêi cheăng, tơkŭm rak ngăn, séa ngăn rak vế krá tơniăn 80km troăng tơkăng kong.

Tơdrêng amê hlối mơdêk hnoăng cheăng plâ mơdât mâu ngế ki pro xôi ƀă pro xôi luât ki ê, malối cho ‘na ma tŭi, tê mơdró kế tơmeăm ôh tá tro luât, lu lêa tung tê mơdró, tê roê, pơto chơ, xúa mlŏi, trếo pơtôu hdrối, tung ƀă klêi kơ’nâi Têt Lo hơnăm nếo. Khu pơkuâ ngăn mố đô̆i gâk tơkăng kong kong pơlê Gia Lai tơrŭm ƀă khu ki ai tơdjâk troh dêi Kul vâ mơnhên tối mâu tơdroăng ki ôh tá tơniăn sap ing pa gong, tơdrêng a mê hlối tơrŭm ƀă mâu khu ki ai tơdjâk troh a kơpong tơkăng kong, pêi pro tro hnoăng cheang hbrâ mơdât, ƀă pơxâu phâk mâu ngế ki pro xôi tâng ai.

Tơplôu: Katarina Nga/VOV Tây Nguyên