Ki xiâm cho môi tiah ‘na jâ H'Blim, a pơlê Mơ Nú, cheăm Čư̆ Á. Ối tung rơpŏng kơtiê ƀă tơdroăng rêh ối cheăng kâ cho xơpá khât, hơnăm 2023 rơpŏng jâ châ khu kăn pơkuâ cheăm gum ăm to ro kăn. Ƀă tơdroăng ki rak ngăn, kơ’nêi krâu, troh nôkố ro hiăng ai kuăn châ môi to, tơhrâ kô pro pơxúa ‘na liăn ngân pêi lo tơniăn ăm rơpŏng tung la ngiâ.

“Tơdroăng rêh ối dêi rơpŏng hdrối nah gá xơpá khât, xua ôh tá ai klâng chiâk vâ mơnhông cheăng kâ. Achê kố kơnôm châ tơdroăng tŏng gum ing khu kăn pơkuâ cheăm hiăng gum ăm rơpŏng á ro kăn vâ păn, klêi kơ’nâi păn kơ’nêi mê nôkố ro ki mê hiăng kân, tơngah kô rĕng ai kuăn, vâ cheăng kâ rơpŏng hngêi rế hía rế chía pơhlêh tâ”.

‘Na troăng tŏng gum, pơlê kong kơdrâm Pleiku hiăng hbru ăm theh Ƀaoh hiêm khăm pơlât ăm tâi tâng rơpŏng kơtiê ƀă rơpŏng vâ chê kơtiê. Kuăn ‘nĕng mâu rơpŏng ki kố ối châ hriâm kơtê, lơ kơdroh nâp liăn hriâm tâp. Jâ Trần Thị Út, Kăn phŏ hnê ngăn Vi ƀan bêng Chi Lăng, pơlê kong kơdrâm Pleilu ăm ‘nâi, kăn ƀô̆ bêng hiăng hnê ăm vâi krâ nhŏng o pơhlêh pêt mâu hdrê loăng ki tơtro, po mâu lâm hnê hriâm ƀă pro tơ’lêi hlâu châ mung liăn kơjo.

“Khu kăn pơkuâ bêng hiăng ƀă dế tơkŭm mâu tơdroăng cheăng tŏng gum mơnhông cheăng kâ, mơdêk ki rơkê plĕng tung hnê hriâm rak ngăn ivá ƀă pơhlêh hngêi trăng troăng klông ăm 3 pơlê hdroâng kuăn ngo. Bêng hiăng krếo thế mâu khu ki ai hiâm mơno hơ-ui tŏng gum pro 7 toăng hngêi, vâi krâ nhŏng o mơdêk ki rơkê plĕng tung rêh ối. Tŏng gum ăm hdrê loăng pêt ƀă mơnăn păn tơtro ƀă mâu tơnêi tơníu, tíu ối dêi 3 pơlê vâ thăm mơdêk pêi châ liăn ƀă tơniăn tơdroăng rêh ối cheăng kâ ăm kuăn pơlê”.

Pơlê kong kơdrâm Pleiku hiăng tŏng gum ăm mâu ngế ki châ tơnêi têa gum mung vâ chê 11 rơtal liăn ƀă liăn laih kơjo. Khu râng liăn xua vâ gum mâu kơtiê xuân hiăng gum pro ƀă ‘mêng 95 toăng hngêi kơnâ lối 4,7 rơtal liăn. Mâu túa cheăng kâ rêh ối châ tơbleăng ƀă kơxô̆ liăn ‘no lối 770 rơtuh liăn ƀă hên ki ê. Pôa Nguyễn Triều Quang, Kăn phŏ pơkuâ Hngêi rak liăn Tŏng gum rêh ối pơlê pơla tíu cheăng a Gia Lai tối rơdêi kô pơtối tơkŭm mâu kơxô̆ liăn, malối cho tơdroăng ki tăng cheăng pêi ăm kuăn pơlê.

“Tíu pêi cheăng dế kơhnâ tí tăng ‘nâi plĕng ăm khu pơkuâ ngăn Đảng pơlê kong kơdrâm, Hô̆i đong hnê ngăn, Vi ƀan hnê ngăn pơtroh kơxô̆ liăn ăm hngêi rak liăn vâ ăm mâu ngế ki châ tơnêi têa gum a pơlê kong kơdrâm châ mung. Riân troh nôkố tâi tâng kơxô̆ liăn chĕn ing mâu tơdroăng tŏng gum châ 402 rơtal liăn, tung mê kơxô̆ liăn râ kong pơlê ƀă pơlê kong kơdrâm cho 51 rơtal liăn, châ kơxô̆ liăn tung pêi pro hnoăng cheăng ăm mung liăn tŏng gum”.

Pleiku hiăng pro môi tơdroăng krê vâ mơdêk rơdêi hnoăng cheăng kơdroh kơtiê krá ton, mơdêk ki rơkê plĕng tung rêh ối dêi kuăn pơlê, malối cho a mâu pơlê dêi hdroâng kuăn ngo tung pơla hơnăm 2021 – 2025. Tơdroăng ki mơhnhôk tá khu pơkuâ tơdroăng kal kí veăng gum, hbrâ rơnáu mơjiâng túa pơkâ kơdroh kơtiê ton hơnăm ƀă xúa tơƀrê kơxô̆ liăn ing mâu tơdroăng pơkâ tơnêi têa kô cho ki xiâm ăm tơdroăng ki ƀlêi chiâng tung hnoăng cheăng kơdroh kơtiê krá ton dêi pơlê kong kơdrâm. Pôa Trịnh Duy Thuân, Kăn pơkuâ ngăn Đảng pơlê kong kơdrâm Pleiku, ăm ‘nâi:

“Ing apoăng hneăng troh nôkố pơlê kong kơdrâm hiăng tơkŭm pơkuâ, hnê mơhno tơbleăng hnoăng kơdroh kơtiê krá ton tro ƀă mâu tơdroăng pơkâ dêi tơnêi têa hiăng châ tơƀrê mâu tơdroăng. Kơxô̆ rơpŏng kơtiê cho hdroâng kuăn ngo ƀă kơxô̆ rơpŏng kơtiê tối tơdjuôm kơdroh rĕng. Kố cho ivá mơ-eăm kân dêi rêm râ pơkuâ cheăng tro ƀă tơdroăng pêi pro mâu tơdroăng pơkâ tơnêi têa”.

Ƀă mâu ivá mơ-eăm ôh tá pơtê, pơlê kong kơdrâm Pleiku dế hiăng vâ pêi klêi pơkâ kơdroh kơtiê krá ton. Mâu troăng hơlâ tŏng gum ƀă tơdroăng tŏng gum hiăng mơdêk tơƀrê, veăng gum pro pơhlêh tơdroăng rêh ối dêi kuăn pơlê, malối cho hdroâng kuăn ngo.