Tơbleăng a rôh leh, Đăi tươ̆ng Lương Tam Quang, Ngế xiâm ngăn kong an ăm ‘nâi: Pơlê kong xiâm Hà Nội cho Tíu xiâm kal kí - tíu pêi cheăng xiâm Tơnêi têa, tíu ki kân má môi ‘na cheăng kâ, túa lĕm tro, tơpui kâ dêi tơnêi têa, ai tíu xiâm  kal khât tung mơnhông dêi  hdroâng mơngế...

Tung pơla 80 hơnăm mơjiâng ƀă mơnhông tơƀrê pơlê kong xiâm ing rơnó hlá ruih kăch măng hơnăm 1945 nah troh nôkố, Kŏng an pơlê kong kân Hà Nội hiăng veăng ‘no hên hnoăng ki kal, ai hên hnoăng ki kân tung tơdroăng cheăng kring vế tơniăn tơnêi têa, rak tơniăn pơlê pơla. Đăi tươ̆ng Lương Tam Quang khê̆n kơdeăn mâu hnoăng pêi kơhnâ dêi Kŏng an pơlê xiâm ƀă tối nhên ki kal dêi tơdroăng cheăng kring vế tơniăn, tung pơla lâp plâi tơnêi ai hên tơdroăng hơ’lêh.