Veăng hâi leh mơdĭng, mâu khu tơ’noăng péa tơdroăng xiâm: Tơdroăng ki rơkê ƀă pêi pro khât. Tung tơdroăng ki tơ’noăng ‘na tơdroăng ki rơkê, mâu khu pro tơmeăm kơchâi kâ ăm vâi hdrêng ƀă hlối ai mơ-ea ki chêh inhên tơmeăm vâ pế pơchên kơchâi kâ. Tơdroăng ki tơ’noăng pêi pro khât, thái cô ƀă nhân viên pơtroh tơmeăm kơchâi kâ dêi rêm khu pơtối pế pơchên 10 hnoăng tơmeăm kâ kơhâi dế ƀă kâ kơxê dêi vâi hdrêng ƀă yă 20.000 liăn/hnoăng.

Pơkâ cho mâu hnoăng kơchâi kâ thế rak tơniăn tŭm 4 khu tơmeăm kâ, mê cho: trếo đăm, trếo piê, trếo tơpoăng ƀă vitamin. Hâi mơdĭng pế pơchên hmê kơchâi kâ tơniăn trếo piê kơhiâm ăm vâi hdrêng mâm non hơnăm 2024 xua kơvâ hnê hriâm ƀă Hnê mơjiâng kong pơlê Kon Tum tơkŭm po tung 2 hâi, sap hâi lơ 6 troh hâi lơ 7/4.

Kố cho roh vâ kăn ƀô̆ pơkuâ, thái cô,  mơngế pêi cheăng a mâu hngêi trung mâm non dêi kong pơlê tơpui tơno ‘na tơdroăng ki rơkê, troăng pêi tung xúa, pế pơchân hmê kơchâi kâ kum vâi hdrêng ai tơ’nôm hên kơchâi kâ kơhiâm ƀă tơniăn trếo piê kơhiâm.