Cheăm Ea Ƀung ối tung ƀăng tơnêi ki kân má môi dêi tơring Ea Súp ƀă vâ chê 30 rơpâu ha. Tâi tâng cheăm ai 1.060 rơpŏng, ƀă 4.078 pơ’leăng mâ mơngế, cho mâu hdroâng kuăn ngo Tày, Nùng, Thái, Rơđế, Jarai, H’Mông, Chứt ƀă Xuăn.

Tâi tâng mâu thôn pơlê hiăng pro túa pơkâ Tôh rak ngăn xêh gâk kring tơnêi têa, rơtế ƀă khu ki ai tơdjâk troh mơjiâng rak ngăn tíu tơkăng kong tâi tâng kuăn pơlê rak vế krá rơdêi hnoăng pơkuâ tíu tơkăng kong. Mâu đông gâk tơkăng kong Dak Ruê, Yok Bruê xuân hiăng hbrâ rơnáu tí tăng ‘nâi plĕng, tŏng kum mơnhông cheăng kâ rêh ối pơlê pơla, malối cho tơdroăng mơjiâng thôn pơlê nếo, kum mâu rơpŏng xơpá ƀă hên ki ê.

Tung rôh po hâi mơdĭng cho tơkŭm po mâu tơdroăng túa lĕm tro, tơ’noăng ivá ƀă khăm pơlât, hbru pơkeăng tê kơtê ăm kuăn pơlê, xua Hngêi pơkeăng Hùng Vương, Nhân Ái pơlê kong kân Hồ Chí Minh tơrŭm ƀă kơbong khăm pơlât khu lêng ƀă kuăn pơlê tơkŭm po. Drêng kố, Khu pơkuâ ngăn Mố đô̆i gâk tơkăng kong, Tơkăng kong kong pơlê Dak Lak, Vi ƀan hnê ngăn tơring Ea Súp hiăng diâp Kỷ niệm chương ăm 10 ngế krê ƀă khu tơrŭm khĕn kơdeăn ăm lối chât ngế krê, khu pú hên ki kơhnâ rơkê má môi tung tơdroăng “tâi tâng kuăn pơlê veăng rak vế tíu tơkăng kong”.