Nôkố, Khu ngăn hnê hriâm ƀă hnê mơjiâng tuăn ngoâ rơkê kong pơlê Dak Lak dế thăm mơdêk tơkŭm po mâu rôh tiâ mơnhên rah xo mot hriâm, tơbleăng tơdroăng cheăng pêi ăm hok tro râ má péa vâ vâi o chiâng vâ rah xo ăm dêi tơná troăng prôk tơtro.

A hâi leh kơ-êng hnê tối ‘na tơdroăng tơ’noăng rah, tơbleăng tơdroăng hriâm cheăng ăm hok tro râ má péa, o Trần Thùy Tú, hok tro lâm 9D, hngêi trung râ má péa Thành Nhất, pơlê kong kơdrâm Ƀuôn Ma Thuột tơmâng hnê, chêh ‘mot tung hlá mơ-éa ƀă klêi mê kơ êng. O tối:

“Klêi po hâi leh á hiăng hlê iâ ‘na ki xiâm hnê hriâm xuân môi tiah hriâm cheăng pêi a mâu Hngêi trung hnê cheăng pêi. Mê kô ai môi tơdroăng rah xo ki tro tâ ăm mâu vâu pú hok tro ki ôh tá ai ivá lơ ôh tá tŭm điêm. Mâu vâi pú kô rế mơnhông tơƀrê tơná xuân môi tiah rah xo tơdroăng cheăng ăm tơtro ƀă tơná tâ”.

Kố cho hơnăm apoăng Khu xiâm ngăn hnê hriâm ƀă hnê mơjiâng tuăn ngôa rơkê kong pơlê Dak Lak tơkŭm po “Hâi leh hnê tối rah, tơbleăng tơdroăng cheăng ăm hok tro râ má péa’’. Cô Nguyễn Thị Lương, Hngêi trung râ má péa Nguyễn Thị Minh Khai, pơlê kong kơdrâm Ƀuôn Ma Thuột ăm ‘nâi, Tơdroăng tơkêa bro “Hnê hriâm cheăng pêi ƀă troăng rơhlâ klâ xoăng hok tro tung hriâm phôh thong tung kong pơlê Dak Lak pơla hơnăm 2018- 2025” hiăng châ tơbleăng sap ing ton nah, la hên mâu hngêi trung mơjiâng pơkâ hnê mê ki tơƀrê ƀă tơdâng hâi to lâi. Tung pơla mê hok tro vâ tăng ‘nâi plĕng ‘na tơdroăng cheăng rế hên.

“Ai mâu vâi o ôh tá rơkê hriâm ‘na chư la rơkê hriâm tơdroăng cheăng ki ê, mê mâu vâi o rơhêng vâ ‘nâi plĕng ‘na tơdroăng cheăng. Môi tiah mâu rôh hnê tối tiah kố hok tro hngêi trung a hriâm hên ngế chêh inâi lăm tơmâng, vâ tăng ‘nâi nhên tâ ‘na mâu hngêi trung trung câ̆p hnê cheăng pê’’.

Veăng hnê tối ‘na rah xo, tơbleăng tơdroăng cheăng hriâm ăm hok tro râ má péa, pôa Đặng Như Thanh, teăng mâ hngêi trung Trung cấp Dak Lak  tối tiah kố, kô cho tơdroăng pêi pro ki kal vâ kum mâu vâi o ‘nâi tăng xêh tơdroăng vâ hriâm ƀă rah xo xêh tơdroăng cheăng pêi ki tơtro ƀă ivá ƀă tuăn ngôa tơná rơkê, tơdroăng ki tơná vâ ƀă tơdroăng kal vâ tung rêh ối pơlê pơla nôkố. Tơdroăng hriâm cheăng pêi xuân po troăng mơhno ăm vâi o châ rah hriâm, ƀă ối veăng kơdroh kơxô̆ liăn nâp hriâm:

“Mâu vâi o dế hriâm tơdroăng hriâm phôh thong, hlối hriâm tơdroăng cheăng, vâ klêi kơ’nâi 3 hơnăm hriâm mâu vâi o kô ai tơdrêng 2 to ƀâng: Ƀâng klêi hriâm râ má pái ƀă ƀâng hriâm cheăng pêi. Ing mê, mâu vâi o kô châ vâ liên thông Cao đẳng, Đại học ah nếo vâ pơtối hriâm tiô tơdroăng tơná púi vâ. Pakĭng mê, Tơnêi têa nôkố ai hên luât pơkâ tŏng kum ăm mâu vâi o hlối hriâm cheăng pêi hlối hriâm chư, mâu luât pơkâ tŏng kum hên’’.

Hơnăm hriâm 2024-2025, Dak Lak tiô tối hdrối ai dâng 31 rơpâu ngế hok tro hiăng klêi hriâm râ má péa phôh thong tâk lối 2 rơpâu ngế  tâng vâ pơchông ƀă hơnăm hdrối. Tung kơxô̆ ki mê ai dâng 23 rơpâu ngế kô mot hriâm a hngêi trung râ má pái phôh thong tiô pơkâ, lối 4 rơpâu ngế hok tro hriâm a Tíu xiâm Hngêi trung hnê cheăng pêi, Hngêi trung Yăo yuk thường xuyên, kơxô̆ ki u ối kô mơhno troăng ăm vâi hriâm cheăng pêi tiô tơdroăng Tơkêa bro “Hnê mơhno troăng hriâm pêi cheăng ƀă mơhno troăng klâ xoăng hok tro hriâm phôh thong tung kong pơlê Dak Lak pơla hơnăm 2018-2025”.

Tiô pôa Đỗ Tường Hiệp, kăn phŏ pơkuâ Tíu xiâm ngăn hnê hriâm ƀă hnê mơjiâng tuăn ngôa rơkê kong pơlê Dak Lak, Khu xiâm dế mơdêk tơkŭm hnê mâu ngế mot hriâm, tơbleăng tơdroăng cheăng ăm hok tro râ má péa vâ mâu vâi o chiâng rah xêh troăng vâ prôk ăm tơtro:  

“Kơvâ ngăn hnê hriâm ƀă hnê mơjiâng tuăn ngôa rơkê mơdêk hlê plĕng ăm mâu thái cô, kăn ƀô̆ rak ngăn, mâu thái cô, malối cho mâu hok tro, nôu pâ hok tro ƀă tâi tâng pơlê pơla ‘nâi tơdroăng klâ xoăng mơhno troăng hriâm drêng klêi hriâm râ má péa cho tơdroăng ki kal. Mâu vâi o pơhlêh tơdroăng rêh ối dêi tơná, tơdroăng hriâm dêi tơná ƀă tơdroăng ôh tá xê to troăng ƀă tơdroăng hriâm mê kô chiâng ƀă troăng hriâm cheăng ƀă kố tăng xêh tơdroăng cheăng kâ tung la ngiâ ăm tơná ing troăng hriâm cheăng’’.

Ing tơdroăng mơdêk hnê tối rah xo, tơbleăng cheăng pêi, tơngah tung la ngiâ, nôu pâ ƀă hok tro hiăng klêi hriâm râ má péa a Dak Lak kô ai mâu tơdroăng rah xo tơtro, ví tơdroăng kơtâu tăng hngêi trung hriâm môi tiah hơnăm hdrối.