Kơxê hâi lơ 7/4, Khu kăn xiâm ngăn pơkeăng pơlât ăm Ngế xiâm phŏ Trần Văn Thuấn pro ngế ki pơkuâ Khu kăn hiăng lăm pêi cheăng ƀă Vi ƀan kong pơlê Dak Lak ‘na tơdroăng tơbleăng pêi tơdroăng tơkêa pro mơjiâng Hngêi pơkeăng kân Xiâm tơnêi têa kơpong Tây Nguyên. Tơdroăng tơkêa bro Hngêi pơkeăng kân xiâm tơnêi têa kơpong Tây Nguyên cho dêi râ xiâm Ngăn pơkeăng pơlât kân 500 to xoăng koi pơlât, tiô tối hdrối châ mơjiâng a bêng Tân An, pơlê kong kơdrâm Ƀuôn Ma Thuột, kong pơlê Dak Lak a tơnêi rơdâ 15,6 ha.   

Kong pơlê hiăng séa ngăn, mơjiâng troăng rơhlâ vâ chêl thiăn, pơtối ăm pro pơlê ối tíu ê, tiô tối hdrối dâng 147 rơtal dollars. A rôh pêi cheăng, mâu kăn hiăng tơkŭm tơpui ‘na tơdroăng gu tơbăng tơnêi a mâu tíu vâ mơjiâng pro; hbrâ ƀă hnê mơngế ki rơkê vâ pêi cheăng a hngêi pơkeăng; séa ngăn pơ’lêh inâi Hngêi pơkeăng vâ pôi tá môi tiah ƀă hngêi pơkeăng ki ê.

Ngế pro xiâm phŏ ngăn pơkeăng pơlât Trấn Văn Thuấn khĕn kơdeăn  tơdroăng tơrŭm dêi kong pơlê Dak Lak ƀă tơdroăng hbrâ ‘no liăn mơjiâng pro Hngêi pơkeăng kân xiâm tơnêi têa Kơpong Tây Nguyên. Pôa púi vâ tung la ngiâ kong pơlê pơtối ai mâu tơdroăng veăng kum Khu xiâm ngăn pơkeăng pơlât rĕng pêi pro mâu hlá mơ-éa tro kơ luât vâ tơleăng pêi tơdroăng tơkêa, tơdroăng chêl thiăn liăn gu tơnêi vâ pro ƀă hên ki ê.