Tiô séa ngăn apoăng, mơ’nui khế 10/2023, Ƀơrô cheăng Gâk kring măng ƀă Ƀơrô cheăng hbrâ mơdât mâu ngế pro xôi xúa kong ngê̆ chal nếo Kŏng an kong pơlê Dak Lak tơdah xo đơn pơtroh tơbleăng dêi môi ngế kuăn pơlê ối a cheăm Ea Tu, pơlê kong kơdrâm Ƀuôn Ma Thuột, ƀă tơdroăng cho tro môi ngế hêâk tê pôm reăng lay ơn tung măng mê xo 10 rơtuh liăn.

Ƀă tơdroăng cheăng, kŏng an mơnhên ngế ki hêak mê cho Nguyễn Văn Khởi, dế rêh ối a kong pơlê Sóc Trăng. Pêi cheăng ƀă kŏng an, apoăng Khởi tối, hdrối nah cho ngế ki hiăng ai tơdroăng xôi “Hêak xo liăn ngân”, tá hâi châ xut tah tơdroăng xôi. Mơ’nui hơnăm 2022, ngế ki nếo lo ing phâk kố pơtối ối ai tuăn tơmiât vâ hêak xo liăn hrê. Vâ pro tơdroăng mê, Khởi bro Facebook inâi "Hoa Tươi Đà Lạt”, tơrŭm tung hên khu roê tê reăng tŭm túa ƀă plâi kâ tung Facebook.

Drêng ai ngế ki êng roê, Khởi pơkâ thế pơtroh liăn kok hdrối mê ah tât lôi troăng tơpui, xo liăn. Ƀă tơdroăng ki kố, ing mơ’nui hơnăm 2022 troh nôkố, Khởi hiăng hêak vâ chê 100 ngế a hên kong pơlê, pơlê kong kân tung lâp tơnêi têa, châ xo kơxô̆ liăn lối 500 rơtuh.