Ki rơhêng vâ tối, Roh hôp ai tơdroăng ki veăng ai mâ dêi 210 ngế ki rơkê kơhnâ teăng mâ ăm khu ki hriăn rơkê, mâu ngế ki hriăn cheăng ‘na khoa hok, văn ngê̆ sih ki hiăng ai hên hnoăng cheăng tung pêi dêi tơdroăng cheăng mê hía nah, veăng kum mơjiâng khoa hok kŏng ngê̆, hnê hriâm, hnê mơjiâng dêi tơnêi têa ƀă khôi túa, vêa vong lĕm tro dêi Việt Nam hloh hlê, rơkê plĕng, tơtro khât tung túa lĕm tro dêi hdroâng mơngế.

Xông tơpui a Roh hôp, Kăn xiâm hnê ngăn tơnêi têa Võ Văn Thưởng mơhno tối tơdroăng ki loi nhoăm, koh mơnê trâu rơdâ troh hên khu râ, kơvâ cheăng, mâu ngế ki hriăn rơkê, mâu ngế hriăn cheăng ‘na khoa hok, văn ngê̆ sih Việt Nam maluâ dế rêh ối, pêi cheăng tung tơnêi têa lơ a mâu  kong têa ê, ƀă hiâm mơno mơjo pâ ƀă hnoăng cheăng dêi tơná, ki rơkê plĕng ki hloh hlê rơkê pơrá veăng kum ăm Tơnêi têa tiô túa krê dêi tơná; rơtế dêi pó tơbêng, mơnhông ivá ki tơrŭm krá kâk pơla tâi tâng hdroâng mơngế ƀă mâu tơdroăng, tơmeăm khoăng ki kơnía git dêi túa lĕm tro, kuăn mơngế Việt Nam. Ing mê, mơjiâng chiâng ivá ki kân kĕng, chông djâ ăm tơnêi têa pin rế hiá rế mơnhông, kro mơdrŏng ƀă hơniâp ro, niân nok tâ.