Pôa Nguyễn Kim May, kăn hnê ngăn Vi ƀan cheăm Ea Ktur, tơring Čư̆ Kuiñ, kong pơlê Dak Lak mơnhên, a cheăm ai rôh klâk têa pro 3 ngế hok tro hlâ. Tung kơxô̆ mâu ngế ki hlâ mê, ai 2 ngế o cho hok tro lâm 4ƀă môi ngế o hok tro lâm 3, hriâm a Hngêi trung râ má môi Nguyễn Đức Cảnh, cheăm Ea Ktur, tơring Čư̆ Kuiñ, kong pơlê Dak Lak. A 11 chôu 30 phut kơhâi dế lơ 22/4, khu hok tro kố drêng vêh hriâm hiăng lăm a long têa Việt Đức 4, cheăm Ea Ktur, tơring Čư̆ Kuiñ, kong pơlê Dak Lak, kơtăn ing hngêi trung dâng 1km vâ hum. Tung pơla hum, mâu vâi o ôh tá mơhúa klêh tung kơpong têa trâu rơ-iêo, mê hlối klâk têa.

Môi khu hok tro kii ê hlo tơdroăng mê hiăng tơkêk trếo thế ngế lăm tŏng xo. Laga, drêng xo mâu vâi muăn troh a kĭng, pơlât apoăng la mâu vâi muăn ôh tá kâi hluăn. Tá 3 ngế hok tro ki trâm xâu xía kố pơrá cho kuăn pơlê hdroâng kuăn ngo, a tơdroăng rêh ối xơpá. Klêi kơ’nâ ai xía vâ, teăng mâ kăn pơkuâ Vi ƀan hnê ngăn cheăm, mâu khu râ kơvâ cheăng đoân thêh hiăng troh kơ-êng, mơhnhôk veăng khéa hơ’nêng ƀă diâp mô iâ liăn vâ roê poăng, tâp ‘mế ăm mâu vâi muăn kố.