Xông tơpui a hneăng hôp, Ngế pro xiâm hnê ngăn tơnêi têa Phạm Minh Chính kheăn kơdeăn tơdroăng mơ-eăm ƀă châ tơƀrê tơxâng mơnhên dêi tâi tâng khu râ kăn pơkuâ, mơngế pơkuâ, mơngế pêi cheăng kơvâ Pơkâ túa cheăng, mơ’no liăn cheăng ƀă Riân kế tơmeăm khoăng, kum kal khât tung tơdroăng châ tơƀrê mơnhông cheăng kâ – rêh ối pơlê pơla dêi tơnêi têa pin tung hơnăm 2023 ƀă tung pơla kố nah.

Ngế pro xiâm hnê ngăn tơnêi têa tối rơdêi, hơnăm 2024 cho hơnăm mơnhông, kơnâ phá tơ-ê kal khât tung tơdroăng pêi pro ƀlêi trâng Pơkâ pêi 5 hơnăm 2021 – 2025. Tối hdrối tơdroăng hơnăm 2024 pơtối pá puât ƀă mơni kô pá puât tâ hơnăm 2023. Khu xiâm pơkâ túa cheăng ƀă mơ’no liăn cheăng kal pêi lĕm tro tâ hnoăng pơkuâ ƀă hnoăng châ pơcháu, mơnhông má môi hnoăng cho kơ koan tơbleăng tơdroăng ki kal.

Đảng, Tơnêi têa, Chin phuh pói vâ ƀă loi tơngah Khu xiâm pơkâ túa cheăng ƀă mơ’no liăn cheăng đi đo ai tơmiât ƀeăn ƀĕng, pơ’lêh nếo, ‘nâi rĕng mâu tơdroăng ki má môi dêi lâp plâi tơnêi, tơnêi têa ƀă ai troăng ngăn hơngế, tơbleăng mâu pơkâ pêi kân ‘na cheăng kâ – rêh ối pơlê pơla ăm Đảng, Kuô̆k hô̆i, Chin phuh.