A hneăng hôp, Vi ƀan tơring Đức Cơ hiăng kĭ ƀă diâp “Hlá mơ-éa chôu vế tơrŭm cheăng mơ’no liăn cheăng ăm 7 tơdroăng tơkêa bro dêi 7 Khu mơ’no liăn cheăng a mâu kơvâ cheăng ki xiâm môi tiah hngêi trăng, troăng klông, khăm pơlât, pêi chiâk deăng – loăng pơlái kong kế. Đức Cơ cho tơring a peăng mâ hâi luô kong pơlê Gia Lai, ai tíu ki kal tung pái víu mơnhông Việt Nam - Lếo – Kul.

Riân troh hơnăm 2023, tơring Đức Cơ hiăng ai 13.000 ha loăng kơxu, 26.000 ha loăng plâi hôt, 9.000 ha loăng kơphế, vâ chê 1.000 ha plâi sầu riêng ƀă 680 ha tiu. Pakĭng mê, kơvâ păn mơnăn mơnôa dêi tơring xuân dế mơnhông tơniăn. Pakĭng mê, tơring Đức Cơ ai hên tơmeăm ai ivá tơtêk ‘na mơnhông ôm hyô, ki rơhêng vâ tối cho ôm hyô pơlê pơla.

Ƀă mâu tơmeăm ai ivá mơnhông, rơdêi nếo tối mê âi, tơring Đức Cơ mơnhên troăng prôk la ngiâ mơnhông ƀă mơhnhôk mơ’no liăn cheăng a mâu tơdroăng tơkêa bro pêi chiâk deăng, mơnhông cheăng kâ pêi chiâk deăng tiô troăng mơdêk ki kơnâ, ki rơhêng vâ tối mơdêk ki châ tơƀrê ƀă ivá tơbriât dêi mâu tơmeăm pêi lo ing chiâk deăng ki xiâm dêi tơring tung kơchơ tê mơdró.