Tơbleăng Kơxop mơ-éa dêi Kăn xiâm pơkuâ hnê ngăn Đảng Nguyễn Phú Trọng ‘na ‘’Mơnhông khôi túa vâi krâ nah rŭm môi tuăn hdroâng mơngế, mơjiâng tơnêi têa pin rế hía rế kro mơdrŏng, rơkê hơniâp lĕm’’ Kăn pơkuâ hnê ngăn cheăng Đảng, Kăn hnê ngăn Vi ƀan xiâm Măt trâ̆n Tơnêi têa Việt Nam Đỗ Văn Chiến tối nhên: Kơxop hlá mơ-éa hbo 747 kơtâ, ai 3 phân chêh hên tơdroăng xiâm ki kal ‘na tơmiât tơpui leăng ƀă tơdroăng pêi nôkố, cho “Hlá mơ-éa chêh rak tơdroăng hnê mơhno ki kal” ăm kăn ƀô̆ tung Măt trâ̆n, mâu khu râ kăn pơkuâ hnê ngăn cheăng Đảng, khu tơrŭm cheăng đảng, kăn ƀô̆ đảng viên, kuăn pơlê hriăn plĕng, xúa tung tơdroăng nôkố.

Ƀă kơxop hlá mơ-éa “Mơjiâng ƀă mơnhông xiâm kối tơpui kâ ƀă kong têa ê, tơpui kâ Việt Nam tâi tâng, tiô rơxông nếo, djâ pêng păm khôi túa lĕm kơnía Việt Nam’’ dêi Kăn xiâm pơkuâ hnê ngăn Đảng Nguyễn Phú Trọng, Kăn teăng mâ – Pôu hnoăng Kăn pơkuâ Hok viê̆n tơpui kâ ƀă kong têa ê (Khu xiâm tơpui kâ ƀă kong têa ê) Phạm Lan Dũng tối ăm ‘nâi, kơxop hlá mơ-éa cho mâu troăng tơmiât pêi, troăng tơmiât hnê mơhno dêi Kăn xiâm pơkuâ hnê ngăn Đảng châ xo vêh ing tơdroăng nôkố, mơhno troăng tơmiât pêi la ngiâ, tuăn ngôa rơkê, tơdroăng hnê mơhno trâu hơngế, kơtăng, tâi tâng, pêng ivá mơhnhôk dêi Kăn xiâm pơkuâ hnê ngăn Đảng ƀă tơdroăng tơpui kâ ƀă kong têa ê dêi Việt Nam.