Kơxo lơ 2/4, a kong pơlê Khánh Hòa, Hneăng hôp tơbleăng pơkâ pêi ƀă mơhnhôk mơ’no liăn cheăng kong pơlê Khánh Hòa hơnăm 2023 xua Khu xiâm pơkâ túa cheăng ƀă mơ’no liăn cheăng tơrŭm ƀă kong pơlê Khánh Hòa tơkŭm po hiăng châ tơkŭm po. Pôa Phạm Minh Chính, Ngế pro xiâm hnê ngăn Chin phuh veăng ƀă xông tơpui hnê mơhno hneăng hôp tơbleăng Pơkâ pêi ƀă mơhnhôk mơ’no liăn cheăng a kong pơlê Khánh Hòa hơnăm 2023.

Kố cho môi tơdroăng ki kal, tro a roh leh tơbâ 370 hơnăm mơjiâng ƀă mơnhông kong pơlê Khánh Hòa ƀă 48 hơnăm Hâi tơleăng lĕm Khánh Hòa. ‘Na pơkâ troăng prôk la ngiâ, hnoăng cheăng, troăng pêi ki xiâm tung la ngiâ, pôa Phạm Minh Chính, Ngế pro xiâm hnê ngăn tơnêi têa pơkâ thế, Khánh Hòa thâ pêi kêi đeăng, pêi pro châ tơƀrê mâu Pơkâ pêi, ki má lối cho mâu pơkâ pêi ki kal hiăng châ kĭ nếo châ tơbleăng, vâ pơtroh mơngế pêi cheăng, pơkuâ môi troăng, tơniăn ki tơdjêp, tơdâng tơ’mô, môi troăng, châ tơƀrê ƀă mơdêk krá tơniăn ƀă troăng pêi ton xŏn, mơnhên troăng prôk mơnhông mơdêk tâi tâng, tơdjêp kơpong, mơnhông tơmeăm ki ai hlâu, mơdêk ó rơdêi cheăng kâ, rêh ối pơlê pơla ƀă rak vế kong prâi.